राजेगाव, ता. २२ ः शाळांमध्ये शालेय पोषण आहार शिजविणाऱ्या आचारी व मदतनीस यांच्या मानधनात वाढ झाली. त्यामुळे ग्रामीण भागातील शाळांमध्ये भात शिजविणाऱ्या बचत गट आणि संबंधित आचारी व मदतनीस यांनी समाधान व्यक्त केले.

प्रधानमंत्री पोषण शक्ती निर्माण योजनेतील आवश्यक असलेल्या अतिरिक्त निधीस मान्यता देण्याचा व कार्यरत स्वयंपाकी तथा मदतनीस यांच्या मासिक मानधनात वाढ करण्याचा निर्णय नुकताच मंत्रिमंडळ बैठकीत झाला. या योजनेंतर्गत कार्यरत असणाऱ्या स्वयंपाकी तथा मदतनीस यांच्या सद्यःस्थितीत असणाऱ्या २५०० प्रति महा मानधनामधील राज्य हिस्स्सामध्ये १००० प्रति महा इतकी वाढ करून प्रति महा ३५०० इतके मानधन अदा करण्यास मान्यता दिली आहे. यासाठी लागणारा एकूण १७५.२० कोटी वार्षिक निधी मंजूर करण्यास मान्यता दिली आहे

राज्य व केंद्र शासनाच्या, स्थानिक स्वराज्य संस्थांच्या, खासगी अनुदानित व अंशतः अनुदानित शाळेमधील पहिली ते आठवी पर्यंतच्या विद्यार्थ्यांना प्रस्तुत योजनेंतर्गत लाभ देण्यात येतो. विद्यार्थ्यांच्या पोषण आहारात वैविध्यता आणण्यासाठी विद्यार्थ्यांना तीन संरचित आहार पद्धतीनुसार (तांदूळ, डाळी, कडधान्यापासून तयार केलेला आहार, मोड आलेले कडधान्य (स्प्राऊटस) व गोड पदार्थ म्हणून तांदळाची खीर व नाचणीसत्व) आहार देण्याचा निर्णय (ता. ११) जून, २०२४ रोजीच्या शासन निर्णयान्वये घेतला आहे. २०२४-२५ या शैक्षणिक वर्षापासून प्रस्तुतप्रमाणे विद्यार्थ्यांना पोषण आहाराचा लाभ देण्यात येणार आहे. या योजनेंतर्गत तीन संरचित आहार पद्धतीप्रमाणे पोषण आहाराचा लाभ देण्यासाठी अतिरिक्त एकूण ६६.६७ कोटी इतका वार्षिक निधी सदर योजनेच्या सर्वसाधारण घटकांतर्गतच्या राज्य हिस्स्यामध्ये मंजूर करून खर्च करण्यास मान्यता दिली आहे.

मानधन वेळेवर मिळावे-मानधनात वाढ केलेली आहे. ही समाधानाची गोष्ट आहे. परंतु, ५-६ महिने मानधन मिळायला विलंब होतो, ते वेळेत आणि महिन्याच्या महिन्याला मिळाले तर आनंद होईल.
- ज्योती साळवे, शालेय पोषण आहार स्वयंपाकी
शाळा, राजेगाव (ता. दौंड)