राजेगाव, ता. १८ : राजेगाव (ता. दौंड) परिसरात मागील पाच-सहा महिन्यांपासून बोकड आणि बकऱ्यांची चोरी होत असून, दिवसेंदिवस चोरी वाढतच चालल्याचे दिसून येत आहे. गुरुवारी (ता. १७) मध्यरात्री एक- दोनच्या सुमार राजेगावनजीक मोघे फार्म हाउस येथून भाऊसाहेब मोघे यांच्या शेळीपालन गोठ्यातून दोन मोठे बोकड चोरीस गेले.
या परिसरात अशा अनेक घटना घडल्या आहेत. त्याचा गावातील शेतकरी आणि पशुपालक यांना मोठा फटका बसत आहे.
वारंवार इतक्या घटना घडूनही अद्याप चोरट्यांचा शोध लागलेला नाही. गावकऱ्यांनी या प्रकरणी अनेक वेळा पोलिसांकडे तक्रारी केल्या असूनही ठोस कारवाई झालेली नाही. प्रशासनाने याकडे गांभीर्याने लक्ष देऊन लवकरात लवकर चोरट्यांचा शोध घ्यावा, अशी मागणी नागरिकांकडून होत आहे.