राजेगाव, ता. २० : स्वामी चिंचोली (ता. दौंड) येथील गायरान जागेत चालू असलेले घरकुल बांधकाम लाभार्थी आणि त्यास पाठबळ देण्याचे काम करणारे संबंधित अधिकारी यांच्यावर फसवणुकीचा गुन्हा दाखल होऊन कारवाई करावी, या मागणीसाठी मुकुंद वेताळ यांनी बेमुदत उपोषण सुरू केले आहे. उपोषणाचा शनिवारी (ता. २०) पाचवा दिवस होता.
स्वामी चिंचोली गावातील सोमनाथ किसन वेताळ यांनी रमाई आवास योजनेअंतर्गत घरकुल मागणीसाठी प्रकरण दाखल करताना त्यासोबत वैयक्तिक सातबारा गट नंबर ४२० दाखल केला होता. परंतु, प्रत्यक्षात गायरानातील जागेवर बांधकाम करण्यास सुरुवात केली. फाउंडेशन लेवलला काम असताना ग्रामपंचायतीकडून त्यांना एकूण तीन हप्ते (एक लाख रुपये) अदाही केले. याबाबत वेताळ यांनी दौंड पंचायत समितीकडे लेखी तक्रार केली होती. गटविकास अधिकारी महेश डोके यांनी ग्रामपंचायतीला लाभार्थ्यावर गुन्हा दाखल करण्याचे कळविले होते. परंतु, संबंधित बांधकाम हे पूर्ण करण्याचे काम चालू आहे. संबंधित लाभार्थ्यावर कारवाई होत नसल्याने वेताळ यांनी दौंड तहसील कार्यालयासमोर १६ जूनपासून बेमुदत उपोषण चालू केले आहे. याबाबत दौंड पंचायत समितीचे घरकुल अधिकारी ओंकार खताळ यांच्याशी संपर्क होऊ शकला नाही.

सदर घरकुल हे बोगस नाही. घरकुलाच्या जागेबाबत निर्माण झालेला वाद गायरान व गावठाण हद्दनिश्चितीनंतर संपुष्टात येईल. गायरान मोजणीकरिता भूमिअभिलेख कार्यालयाकडे ग्रामपंचायतीने पत्रव्यवहार केला आहे. वरिष्ठांच्या आदेशानुसार योग्य ती कार्यवाही ग्रामपंचायतीकडून करण्यात येईल.
- स्वाती लोंढे, ग्रामपंचायत अधिकारी, स्वामी चिंचोली (ता. दौंड)

गावठाण व गायरान जागेची मोजणी केल्यानंतर वरिष्ठांचे आदेशानुसार पुढील कार्यवाही करण्यात येईल.
- पुनम मदने, सरपंच, स्वामी चिंचोली (ता. दौंड)