सोमेश्वरनगर, ता. ८ : कर्नलवाडी (ता. पुरंदर) येथील शरद-विजय सहकारी सोसायटीत २०१९ ते २०२४ या कालावधीत तब्बल १ कोटी ४५ लाख रुपयांचा अपहार झाल्याचे लेखापरीक्षणातून स्पष्ट झाले. सोसायटीचा सचिव मंगेश सुभाष निगडे यास वैयक्तिकरित्या अपहारास जबाबदार ठरवले आहे. पुणे जिल्हा बँकेचे पवन भगवान दुर्गाडे व मयूर चंद्रकांत भुजबळ या दोन विकास अधिकाऱ्यांसह सोसायटीच्या दोन माजी सचिवांना जबाबदार धरले आहे. तसेच, २२ संचालकांवर कर्तव्यात कसूर केल्याचा ठपका ठेवला आहे.
कर्नलवाडीतील शरद-विजय सहकारी विकास सोसायटीत सुरू असलेल्या गैरव्यवहाराबाबत ‘सकाळ’ने २७ ते २९ मे २०२४ कालावधीत ‘फोफावलेला भ्रष्टाचार’ नावाने वृत्तमालिका प्रसिद्ध केली होती. यानंतर जागे झालेल्या यंत्रणेने चौकशीला सुरवात केली. सचिव निगडे याने अनेक शेतकऱ्यांच्या नावावर केलेल्या अपहाराची जवळपास नव्वद लाख रुपयांची रक्कम हस्तगत केल्याने काही शेतकऱ्यांना दिलासा मिळाला. मात्र, त्यानंतर आणखी दीड कोटींचा अपहार झाल्याचे लेखापरीक्षक धनंजय निगडे आणि महेंद्र साळुंखे यांनी केलेल्या लेखापरीक्षणातून समोर आले.
पुणे जिल्हा बँकेच्या नीरा शाखेद्वारे शरद-विजय सोसायटीत तब्बल ८८ लाख ३० हजार रुपये अपहार आणि ५७ लाख ३८ हजार रुपये आर्थिक नुकसान असा एकूण १ कोटी ४५ लाख रुपयांचा अपहार व गैरव्यवहार झाल्याचे निष्पन्न झाले. लेखापरीक्षणादरम्यान २०२३ च्या आधीचा लेखनिक व त्यानंतरचा सचिव निगडे याने अपहारास व नुकसानीस वैयक्तिकरित्या जबाबदार असल्याचे मान्य केले आहे. तसेच जिल्हा बँकेचे विकास अधिकारी दुर्गाडे व भुजबळ यांच्यावरही सामूहिक जबाबदारी टाकली आहे. सोसायटीचे विद्यमान अध्यक्ष बाळासाहेब विठ्ठल निगडे यांना ‘नील’चा दाखला देण्याबद्दल जबाबदार धरले आहे. तसेच २०१९-२०२० या अल्पकाळाचे सचिव हनिफ सय्यद, २०२० ते २०२३ या तीन वर्ष कालावधीचे सचिव संदीप ताकवले या अन्य दोघांनाही अपहारास नसले तरी सचिवपदाची जबाबदारी पार न पाडल्याचा आणि विद्यमान व माजी संचालक मंडळातील २२ जणांवर कर्तव्यात कसूर केल्याचा ठपका ठेवला आहे.
याबाबतचा सविस्तर अहवाल सहकार निबंधक पुरंदर तालुका व जिल्हा उपनिबंधक पुणे जिल्हा यांना सादर झाला आहे. तसेच, जेजुरी पोलिसांकडेही तक्रार प्रलंबित असल्याचे समजते.