सुपे, ता. १७ : सुपे (ता. बारामती) येथील श्रीशहाजीराजे विविध कार्यकारी सेवा सहकारी संस्थेच्या अध्यक्षपदी नीलेश तांबे, उपाध्यक्षपदी विलास खैरे यांची बिनविरोध निवड करण्यात आली. या आधीचे पदाधिकारी सागर खैरे, पांडुरंग कुदळे यांनी राजीनामा दिल्याने रिक्त जागी ही निवड करण्यात आल्याची माहिती सचिव तुषार पानसरे यांनी दिली. बारामती येथील सहकारी संस्थेच्या साहाय्यक निबंध कार्यालयात या निवडी झाल्या. निवडणूक निर्णय अधिकारी म्हणून सहायक निबंधक प्रमोद दुर्गुडे यांनी काम पाहिले. निवडणूक प्रक्रियेसाठी सचिव पानसरे, सहायक रणजीत तांबे यांनी मदत केली. संस्थेचे सभासद एक हजार ३३६ आहेत. भाग भांडवल एक कोटी, ३९ लाख, २६ हजार ४४५ रुपये आहे. आर्थिक उलाढाल सुमारे साडेआठ कोटींची असून, कर्जवाटप सुमारे सव्वा सहा कोटींचे केल्याची माहिती यावेळी देण्यात आली.