शिरूर, ता. २९ : कारेगाव (ता. शिरूर) येथील श्री कारेश्वर मंदिराचा गाभारा श्रावणी सोमवारनिमित्त सुगंधित आणि रंगीबेरंगी फुलांनी सजविला होता. हजारो फुलांचा वापर करून गाभाऱ्यासह मंदिराचा कळस व परिसरात आकर्षक सजावट केली होती. परिसरात रोषणाई केली होती.
उद्योजक शुभम नवले यांनी आपले वडील सुरेंद्रकुमार ऊर्फ बापूसाहेब नवले यांच्या स्मृतीप्रित्यर्थ मंदिराच्या मुख्य गाभाऱ्यासह, शिवलिंगावर आणि मंदिर परिसरात फुलांची आकर्षक सजावट केली. मंदिराच्या सभामंडपातील नंदी, त्रिशूल, डमरू, गज यासह शेजारील श्री गणेश मंदिरातही फुलांची मनोहारी आरास केली होती. कारेगावच्या माजी सरपंच निर्मला नवले व शुभम नवले यांनी पहाटे श्री कारेश्वर मंदिरात महापूजा केली. आरतीनंतर उपस्थित शिवभक्तांना फळांच्या प्रसादाचे वाटप केले. एमआयडीसीमुळे कारेगाव परिसरात परप्रांतीय कामगार मोठ्या प्रमाणात वास्तव्यास असून, आज श्रावणी सोमवार निमित्त विशेषतः उत्तर भारतीय शिवभक्तांनी ‘बम बम भोले’चा गजर करीत दर्शनासाठी गर्दी केली होती.