सासवड, ता. ७ : सासवड बसस्थानकासमोरील आइस्क्रीम पार्लरमध्ये १८ जुलै २०२४ ला दुपारी राहुल नामदेव टिळेकर यांच्यावर झालेल्या गोळीबारातील तीन फरार आरोपींपैकी एका आरोपीला सासवड पोलिसांनी सोमवारी मध्यरात्री २ वाजता हांडेवाडी चौक (ता. हवेली) येथे सापळा रचून अटक केली आहे. सासवड न्यायालयाने तीन दिवसांची पोलिस कोठडी सुनावली आहे.
याबाबत सासवड पोलिसांनी यापूर्वी प्रताप जगताप, अजय जगताप, दयानंद जगताप (सर्व रा. मांडकी, ता. पुरंदर) तसेच सूजल तमन्ना आंबेघर (रा. चंदननगरए आणि सुमीत कमलाकर वाघमारे (रा. उंड्री) यांना अटक केली होती. तसेच वाघमारे याच्याकडून गुन्हात वापरलेले दोन पिस्तूल, पाच जिवंत काडतुसे आणि एक पुंगळी असा १ लाख २ हजार ५०० रुपयांचा मुद्देमाल जप्त केला होता.
६ जानेवारी ला फरार आरोपींपैकी परशुराम ऊर्फ परमा कामन्ना माने हा छत्तीसगड येथून उंड्री येथे आल्याची माहिती सासवडचे पोलिस निरीक्षक ऋषिकेश अधिकारी यांना मिळाली. त्यांनी तातडीने डीबी पथकातील हवालदार सूरज नांगरे, लिकायतअली मुजावर आणि पोलिस नाईक गणेश पोटे यांना साध्या वेशात उंड्री येथे पाठवले. गोपनीय बातमीदाराच्या मदतीने हांडेवाडी चौकात सापळा रचून ताब्यात घेऊन अटक केली. पोलिस निरीक्षक ऋषिकेश अधिकारी तपास करीत आहेत.