सासवड, ता. १० : सासवड (ता. पुरंदर) येथील संत सोपानदेव समाधी मंदिरात संत शिरोमणी नामदेव महाराज यांच्या षष्ठशतकोत्तर अमृत महोत्सवानिमित्त अखंड हरिनाम सप्ताहाचे आयोजन केल्याची माहिती अमेय महाराज शिंदे आणि ऋतिक महाराज पवार यांनी दिली.
संत नामदेव महाराज यांच्या फड परंपरेनुसार, गुरु केशव महाराज नामदास यांच्या मार्गदर्शनाखाली वैशाख शुद्ध पंचमी, शनिवार (ता. १७) ते वैशाख वद्य नवमी बुधवार (ता. २१) या कालावधीत हा अखंड हरिनाम सप्ताह रंगणार आहे. कार्यक्रमाचे आयोजन संत नामदेव महाराज फड पुरंदर आणि बारामती तालुका समस्त वारकरी मंडळ यांच्या वतीने करण्यात आले आहे. भाविकांनी या अमृत महोत्सवी सप्ताहाचा लाभ घ्यावा, असे आवाहन आयोजकांनी केले आहे.
सप्ताहातील दैनंदिन कार्यक्रम : पहाटे ४ ते ६ काकड आरती, सकाळी ७ ते १० सोपानदेव पारायण, सकाळी १० ते १२ गाथा पारायण, दुपारी ३ ते सायंकाळी ५ नेमाचे भजन, सायंकाळी ५ ते ६ हरिपाठ, सायंकाळी ७ ते ९ कीर्तन, रात्री १० ते पहाटे ४ हरिजागर.
या सप्ताहात गाथा भजन गुरु श्रीहरी महाराज नामदास, पंढरपूर यांचे होणार आहे. शनिवारी (ता. १७) संत नामदेव महाराज यांचे सतरावे वंशज गुरु विठ्ठल महाराज नामदास यांचा चोखोराया निर्वाण दिन सकाळी १० ते दुपारी १२ या वेळेत होईल. या काळात समस्त डांगे पंचमंडळ, मोठे माउली ज्ञानेश्‍वर महाराज कदम, जोग महाराज वारकरी शिक्षण संस्था यांची कीर्तने होणार आहेत. बुधवारी (ता. २१) सकाळी ९ ते ११ या वेळेत काल्याचे कीर्तन संत नामदेव महाराज यांचे सोळावे वंशज गुरु केशव महाराज नामदास यांचे होणार आहे.