सासवड, ता. ११ : ‘‘‘गावच्या स्वच्छतेची सुरुवात शाळेपासूनच होते, ही स्व. चंदुकाकांची संकल्पना होती. त्यांचे शिक्षण, सहकार आणि सामाजिक कार्याचे योगदान मोठे असून, त्यांचा हा वारसा माजी आमदार संजय जगताप आणि त्यांच्या कुटुंबीयांनी पुढे नेला आहे. संत सोपानकाका सुंदर माझी शाळा अभियानाचे अनुकरण राज्य सरकारने करून मुख्यमंत्री सुंदर माझी शाळा हा उपक्रम सुरू केला, हे या नेतृत्वाची दूरदृष्टी दर्शवते,’’ असे प्रतिपादन पुणे विभागाचे शिक्षक आमदार जयंत आसगावकर यांनी केले.
दिवंगत लोकनेते स्व. चंदुकाका जगताप यांच्या जयंतीनिमित्त संत सोपानकाका सहकारी बँक, संत सोपानकाका फाउंडेशन आणि श्री शिवाजी शिक्षण प्रसारक मंडळ, सासवड यांच्या वतीने ‘संत सोपानकाका स्वच्छ व सुंदर शाळा’ हा अभिनव उपक्रम सलग तिसऱ्या वर्षी राबवण्यात आला. माजी आमदार संजय जगताप यांच्या संकल्पनेतून आयोजित या उपक्रमात ५ जिल्ह्यांमधील ६२ तालुक्यांतील सुमारे ३५०० शाळा सहभागी झाल्या होत्या. सासवड (ता. पुरंदर) येथील आचार्य अत्रे सांस्कृतिक भवनात बुधवारी (ता. ११) झालेल्या बक्षीस वितरण समारंभात विजेत्या शाळांना गौरविण्यात आले.
याप्रसंगी माजी आमदार संजय जगताप म्हणाले, ‘‘स्व. चंदुकाका जगताप यांनी पतसंस्था, बँक, शिक्षण संस्था आणि इतर अनेक संस्था स्थापन केल्या. त्यांच्या कामाच्या पद्धतीत पारदर्शकता, शिस्त, स्वच्छता आणि सुबकता होती म्हणूनच, स्वच्छ व सुंदर शाळा स्पर्धा त्यांच्या जयंतीदिनी शाळांना प्रोत्साहन देण्यासाठी आणि ग्रामीण भागातील शाळांच्या सक्षमीकरणासाठी हाती घेण्यात आली आहे. पुढील काळात हा उपक्रम आणखी मोठ्या प्रमाणात राबवण्यात येणार आहे.’’
सतीश उरसळ, रामदास थिटे, संजयकुमार झांबरे, तानाजी माने, अरुण थोरात, दादासाहेब लाड आदींनी स्व. चंदुकाका जगताप यांच्या कार्याचे कौतुक करीत ग्रामीण भागातील मराठी शाळा, शिक्षक टिकले पाहिजेत, विद्यार्थी शिकले पाहिजेत यासाठी नवीन संच मान्यतेबाबत सर्वांनी लढा दिला पाहिजे, असा सुर काढला.
याप्रसंगी चंद्रकांत पाटील, रमणिकलाल कोठडिया, प्रकाश पवार, राजवर्धिनी जगताप, धनंजय काकडे, संजय आंबेकर, सुभाष माने, अमृत पांढरे, प्रसाद गायकवाड, राहुल पवार यांसह पुणे विभागातील विविध शिक्षक संघटनांचे पदाधिकारी, शिक्षक उपस्थित होते. कुंडलिक मेमाणे, दिलीप साबणे, अनिल उरवणे, रविंद्रपंत जगताप, चंद्रशेखर जगताप, विश्वजीत आनंदे, सतीश शिंदे, रामप्रभू पेटकर यांनी नियोजन केले. समन्वयक नंदकुमार सागर यांनी प्रास्ताविक, सुधाकर जगदाळे यांनी स्वागत, तर दत्तात्रेय रोकडे यांनी सूत्रसंचालन केले. वसंतराव ताकवले यांनी आभार मानले.
पुरंदरच्या समृद्ध भूमीने महाराष्ट्राला मार्गदर्शन केले. स्व. चंदुकाकांचे समाजासाठीचे सर्व क्षेत्रांतील योगदान महत्त्वाचे आहे. संजय जगताप व कुटुंबीय समाज परिवर्तनाचे प्रेरक कार्य करीत असून त्यांच्या या उपक्रमातून सर्वांनी स्फूर्ती घेतली पाहिजे.
- कांतिलाल उमाप, माजी शिक्षण आयुक्त
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.