सासवड, ता. ७ : ‘‘जुन्या इमारतीच्या जागी नवीन इमारत उभारण्याचे नियोजन आहे. यामध्ये सध्या असलेल्या सर्व गाळेधारकांना याच ठिकाणी दुकानांसाठी जागा देण्यात येईल. कोणत्याही व्यावसायिकाला विस्थापित होऊ दिले जाणार नाही किंवा कोणावरही अन्याय होणार नाही, याची आम्ही पूर्ण काळजी घेऊ,’’ असे आश्‍वासन माजी आमदार संजय जगताप यांनी गाळेधारकांना दिले.
सासवड (ता. पुरंदर) येथील जैन मंदिरात नगरपालिकेच्या १०० वर्षे जुन्या सभागृहाच्या धोकादायक इमारतीमधील व्यावसायिकांच्या प्रश्नावर तोडगा काढण्यासाठी माजी आमदार जगताप आणि व्यापारी असोसिएशनचे अध्यक्ष संजय चव्हाण यांच्या उपस्थितीत गाळेधारकांची बैठक पार पडली. यावेळी जगताप बोलत होते.
या बैठकीमध्ये गाळेधारकांचे प्रतिनिधित्व करताना संजय चव्हाण यांनी, या धोकादायक इमारतीमधील छोटे गाळे अनेक कुटुंबांच्या उदरनिर्वाहाचे साधन आहेत. विविध समाजातील लोक येथे व्यवसाय करून आपलं जीवन जगत आहेत. त्यामुळे या सर्व व्यावसायिकांना विस्थापित न करता, याच जागेवर नवीन इमारत बांधून त्यांना त्याच ठिकाणी दुकाने उपलब्ध करून देण्यात यावीत, अशी मागणी केली.
याबाबत पालिकेच्या मुख्याधिकाऱ्यांशीही चर्चा झाली असल्याचे जगताप यांनी सांगितले. जगताप यांच्या या आश्वासनामुळे गाळेधारकांमध्ये समाधानाचे वातावरण निर्माण झाले आहे. या इमारतीचे बांधकाम लवकर सुरू होऊन व्यावसायिकांना सुरक्षित आणि नवीन गाळे मिळण्याची अपेक्षा गाळेधारकांनी व्यक्त केली आहे. माजी आमदार जगताप व्यावसायिकांसाठी चांगला निर्णय घेतील व तो आम्हाला मान्य असेल, असे संजय चव्हाण यांनी व्यावसायिकांच्या वतीने स्पष्ट केले.