थेऊर ता. ७ : हवेली तालुक्यातील लोणी काळभोर- रामदरा रस्त्यावर भरधाव चाललेल्या डंपरची दुचाकीला घडक बसली. डंपरचे चाक हातावरून गेल्याने शिवाजी रामचंद्र काळभोर (रा. सिद्राम मळा, लोणी काळभोर) हे गंभीर जखमी झाले आहेत. याप्रकरणी बापूसाहेब बबन काळभोर (वय ४६, रा. तारासिटीजवळ, लोणी काळभोर) यांनी लोणी काळभोर पोलिस ठाण्यात फिर्याद दिली. त्यानुसार डंपरवरील अज्ञात चालकावर गुन्हा दाखल केला आहे.
पोलिसांनी दिलेल्या माहितीनुसार, फिर्यादी बापूसाहेब काळभोर व त्यांचे मित्र शिवाजी काळभोर हे दोघे बुधवारी (ता. ६) अॅक्टीवा दुचाकीवरून घरी चालले होते. बापूसाहेब हे दुचाकी चालवीत होते, तर शिवाजी हे पाठीमागे बसले होते. तेव्हा रामदराकडून लोणी काळभोर गावाच्या दिशेने एक हायवा भरधाव चालला होता. रस्त्यावर जागा कमी असल्याने दुचाकीच्या पाठीमागे बसलेले शिवाजी यांनी हायवा चालकाला हात दाखवून डंपर हळू चालविण्यास सांगितले. परंतु, हायवा चालकाने त्याकडे दुर्लक्ष करून त्याने थेट दुचाकीला धडक दिली आणि कोणतीही मदत न करता पळून गेला. अपघातात शिवाजी हे रस्त्याच्या उजव्या बाजूला पडले व बापूसाहेब हे रस्त्याच्या डाव्या बाजूला पडले. या अपघातात शिवाजी यांच्या उजव्या हातावरुन हायवाचे चाक गेले. तसेच, त्यांच्या डोक्याला व मणक्याला मार लागून ते गंभीर जखमी झाले. स्थानिक नागरिकांनी तत्काळ त्यांना लोणी काळभोर येथील एका खासगी रुग्णालयात उपचारासाठी दाखल केले. त्यांची प्रकृती गंभीर असल्याची माहिती तेथील डॉक्टरांनी दिली. अज्ञात वाहनचालकावर गुन्हा दाखल केला आहे.