उरुळी कांचन, ता. ९ : मामासह त्यांच्या कुटुंबीयांना लाकडी फावड्याच्या दांडक्याने केलेल्या मारहाणीत जखमी झालेल्या मामाच्या मुलाचा उपचारादरम्यान मृत्यू झाला होता. या प्रकरणी जिल्हा सत्र न्यायालयाने एकाला जन्मठेप व पाच हजार रुपये दंडाची शिक्षा सुनावली आहे. तसेच, १० वर्षे सक्तमजुरी व तीन हजार रुपये दंड, कलम ४५२ खाली ५ वर्षे सक्तमजुरी व एक हजार रुपये दंड असे शिक्षेत नमूद करण्यात आले आहे. विठ्ठल बाबासाहेब गुंड (वय ३१ रा. गुंडेवाडी, ता. आष्टी, जि. बीड) असे न्यायालयाने शिक्षा सुनावलेल्याचे नाव आहे. तर, बाळकृष्ण महादेव धस असे खून झालेल्याचे नाव आहे.
‘दुसऱ्या समाजाच्या मुलीबरोबर प्रेम सबंध ठेऊ नको,’ असे मामाने सांगितल्याच्या कारणावरून २९ जून २०१६ रोजी पहाटे २ वाजता आरोपी विठ्ठल बाबासाहेब गुंड याने लाकडी फावड्याने त्याचा मामा महादेव धस, मंदा महादेव धस, अमोल महादेव धस, बाळकृष्ण महादेव धस, बाळा सूर्यभान गावडे (सर्व रा. पाटील वस्ती, लोणी काळभोर, ता. हवेली) यांना जबर मारहाण केली होती. यात उपचारादरम्यान बाळकृष्ण याचा मृत्यू झाला. याप्रकरणी लोणी काळभोर पोलिस ठाण्यात खूनाचा गुन्हा दाखल झाला होता. पोलिस निरीक्षक रणजितसिंग परदेशी यांनी विठ्ठल याच्या विरोधात सबळ पुरावे गोळा करून ९ जुलै २०१६ रोजी न्यायालयात दोषारोपपत्र दाखल केले होते. दोन्ही बाजूंचे युक्तिवाद ऐकवून घेतल्यावर न्यायालयाने पुराव्याच्या आधारे गुरुवारी (ता. ८) आरोपी विठ्ठल याला जन्मठेप, पाच हजार रुपये दंडाची शिक्षा सुनावली आहे. कलम ३०७ खाली १० वर्षे सक्तमजुरी व तीन हजार रुपये दंड, कलम ४५२ खाली ५ वर्षे सक्तमजुरी व एक हजार रुपये दंड शिक्षा सुनावली.
सरकारी पक्षातर्फे सरकारी वकील जावेद खान, कोर्ट पैरवी ललिता कानवडे यांनी काम पाहिले.