उरुळी कांचन, ता. १० : पुणे- सोलापूर महामार्गालगत थेऊर (ता. हवेली) येथील राखपसरे वस्ती येथे दुचाकीच्या किरकोळ अपघातातून उद्भवलेल्या वादात तडीपार गुंडाच्या टोळक्याने एका कुटुंबावर लोखंडी रॉड, दगड, विटांनी हल्ला करून मारहाण केल्याची गंभीर घटना बुधवारी (ता. ९) सकाळी अकराच्या सुमारास घडली. या घटनेत स्वप्नील काळभोर, सतीश काळभोर, गोटू शेंडगे, दिलीप काळभोर, जयश्री काळभोर आणि सिंधु काळभोर हे जखमी झाले आहेत.
या प्रकरणी सिंधु शरद काळभोर (वय ५३, रा. कुंजीरवाडी, ता. हवेली) यांनी लोणी काळभोर पोलिस ठाण्यात फिर्याद दाखल केली आहे. याप्रकरणी स्वराज राखपसरे, संजय राखपसरे, पांडा राखपसरे, अजय राखपसरे, माऊली राखपसरे (सर्व रा. राखपसरे वस्ती, थेऊर) आणि पाच- सहा अनोळखी इसमांविरोधात गुन्हा दाखल केला आहे. मात्र, घटनेनंतर तब्बल २४ तास उलटूनही एकाही आरोपीस अटक झालेली नाही.
फिर्यादी काळभोर यांचा शेती व्यवसाय असून, त्या आपल्या मुलांसह कुंजीरवाडी परिसरात राहतात. बुधवारी सकाळी गोटू शेंडगे या कामगाराने फोन करून त्यांच्यावर काही व्यक्ती हल्ला करत असल्याची माहिती दिली. या माहितीवरून सिंधू काळभोर, त्यांचा मुलगा स्वप्नील व दीर सतीश घटनास्थळी पोहोचले. तेथे शेंडगे याला आरोपी लाकडी दांडके, लाथाबुक्क्यांनी मारहाण करत होते. मध्यस्थी करण्याचा प्रयत्न करताच आरोपी स्वराज राखपसरे याने काळभोर यांना कानशिलात लगावत शिवीगाळ केली, तर पांडा राखपसरेने लोखंडी रॉडने स्वप्नीलच्या हातावर, संजय राखपसरेने सतीश काळभोर यांच्यावर हल्ला केला. अजय आणि माऊली राखपसरे यांनी जयश्री काळभोर यांनाही रॉडने मारहाण केली. यावेळी काही अनोळखी इसमांनीही दगड, विटांनी हल्ला करत टोळके घटनास्थळावरून पसार झाले. पुढील तपास पोलिस उपनिरीक्षक दिगंबर सोनटक्के करीत आहेत.
आरोपींना पकडण्यात पोलिस हतबल
या गुन्ह्यातील मुख्य आरोपी पांडा राखपसरे हा अट्टल गुन्हेगार असून, त्याच्यावर लोणी काळभोर पोलिस ठाण्यात यापूर्वीही गंभीर स्वरूपाचे गुन्हे दाखल आहेत. परिसरात त्याने अवैध धंद्यांद्वारे दहशत निर्माण केली आहे. तो उघडपणे फिरत असूनही पोलिसांनी अटक केलेली नाही.
आरोपींना पुढाऱ्यांचे संरक्षण
स्थानिक नागरिकांचे म्हणणे आहे की, स्थानिक राजकीय पुढाऱ्यांचा आरोपींना संरक्षण असल्याने पोलिस प्रशासन कारवाईस टाळाटाळ करत आहे. गुन्हा दाखल होण्यास रात्रीपर्यंत विलंब, तसेच कारवाई न झाल्यामुळे पोलिसांच्या कार्यक्षमतेवर प्रश्नचिन्ह उपस्थित झाले आहे. गुन्हेगारीत राजकीय हस्तक्षेप वाढल्याने पोलिसांची अडचण वाढल्याचे या घटनेतून पुन्हा अधोरेखित झाले आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.