वेल्हे, ता. ७ : आंबेड (ता. राजगड) येथील रेशन दुकानदार पोपट नारायण पासलकर (रा. आंबेड, ता. राजगड) यांच्यावर शिधावाटपातील अपहार, नागरिकांची फसवणूक आणि गैरप्रकार केल्याप्रकरणी वेल्हे पोलिस ठाण्यात रविवारी (ता. ६) गुन्हा दाखल करण्यात आला. याबाबतची माहिती वेल्हे पोलिस ठाण्याचे प्रभारी सहाय्यक पोलिस निरीक्षक नितीन खामगळ यांनी दिली.
या प्रकरणी राजगड तालुका पुरवठा अधिकारी शीतल अनासाने (वय ३६) यांनी फिर्याद दिली आहे. पोलिसांनी दिलेल्या माहितीनुसार रेशन दुकानाची तपासणी केली असता तालुका पुरवठा अधिकारी यांना तपासणीमध्ये अनेक दोष व त्रुटी आढळून आल्या आहेत. यामध्ये प्रामुख्याने दुकानात ग्रामदक्षता समिती फलक, भाव फलकसाठा दर्शविणारा फलक दर्शनीय भागावर लावलेला नाही, तर सार्वजनिक व्यवस्थेच्या तक्रारी संबंधित हेल्पलाइन क्रमांक दर्शनी भागावर लावला नाही. रजिस्टर तक्रार नोंदवही, भेटवही, विक्री रजिस्टर दुकानदार यांनी तयार केली नसल्याचे तोंडी सांगितले. त्यामुळे या नोंदवह्या दुकानात उपलब्ध नाहीत. तसेच पासलकर यांच्या दुकानात अस्वच्छता होती. रास्त भाव दुकानदार हे पुण्यात राहत असून, नियमित धान्य रेशन धारकांना देत नसल्याच्या तक्रारी आल्या आहेत. रेशनिंग दुकानदार हे लाभार्थ्यांना धान्य कमी देत आहेत. अंगठा आधीच घेतला जात असून, पावती देत नाहीत. नागरिकांना रेशन घेण्यासाठी वारंवार त्यांच्या दुकानांमध्ये हेलपाटे मारावे लागत असून, नवीन रेशनकार्ड घेण्याकरिता चार ते पाच हजार रुपये रेशनिंग दुकानदार पासलकर घेत असल्याच्या तक्रारी शिधापत्रिका धारकांनी लेखी नोंदवल्या आहेत.
जून, जुलै, ऑगस्ट २०२५ या तीन महिन्यांसाठी शिधापत्रिकाधारकांकडून ई- पास मशिनवर तीनवेळा अंगठे १२ जून २०२५ रोजी घेण्यात आले आहे. मात्र, ११ क्विंटल ४६ किलो गहू आणि १७ क्विंटल १९ किलो तांदूळ धान्याचे वितरण केले नसल्याचे आढळून आले आहे. यामुळे या धान्याचा अपहार केल्याचे फिर्यादीत म्हटले आहे. वजन काटा बंद आहे, चार्ज करायचा आहे, पुढच्या आठवड्यात धान्य देतो असे दुकानदार पासलकर यांनी सांगितले असल्याचे शिधापत्रिका धारकांनी त्यांच्या जबाब नोंदवले आहे. त्यानुसार पासलकर यांच्याविरुद्ध पोलिस ठाण्यात तक्रार दाखल केली असून, या प्रकरणी गुन्हा नोंद करण्यात आल्याची माहिती खामगळ यांनी दिली.