यवत ता. ६ : हाफ पँट आणि बनियनवर आलेल्या अज्ञात तिघांनी केलेल्या हल्ल्यात एकाचा जागीच मृत्यू झाला असून, तिघे गंभीर जखमी झाले आहेत. यवत (ता. दौंड) येथील निळकंठेश्‍वर मंदिराजवळ बुधवारी (ता. ५) रात्री पावणेबाराच्या सुमारास घटना घडली. दरम्यान, बाथरूममध्ये लपल्याने मृताची पत्नी आणि तीन वर्षांचा मुलगा बचावले आहेत.
विश्‍वजित शशिकांत चव्हाण (वय ३४) असे मृताचे नाव असून, शशिकांत चव्हाण, उज्वला शशिकांत चव्हाण, प्राची वैभव यादव हे गंभीर जखमी झाले आहेत. सारीका विश्‍वजित चव्हाण यांनी पोलिसांत फिर्याद दिली आहे.
पोलिसांनी दिलेल्या माहितीनुसार, हाफ पॅंट व बनियन अशा वेशातील तीन हल्लेखोरांनी रात्री पावणेबाराच्या सुमारास हा हल्ला केला. त्यांनी प्रथम घराबाहेर आलेल्या विश्‍वजितच्या डोक्यात दांडक्याने प्रहार केले. यात त्याचा जागीच मृत्यू झाला. त्यानंतर घरातील इतर सदस्यांवर हल्ले करण्यास सुरुवात केली. त्यांनी शशिकांत, त्यांच्या पत्नी उज्वला व विवाहीत मुलगी प्राची यांच्या डोक्यावर प्रहार करून त्यांना गंभीर जखमी केले. विश्‍वजित यांची पत्नी सारीका या मुलासह बाथरूममध्ये लपल्याने त्यांचा बचाव झाला. जखमींना रूग्णालयात दाखल करण्यात आले आहे. चव्हाण यांचे घर त्यांच्या शेतात आहे. या ठिकाणी सुरू असलेला आरडाओरडा ऐकून शेजारील वस्तीवरील अरुण मुळीक व संतोष मुळीक मदतीसाठी धावून गेले. त्यांना पाहताच हल्लेखोरांनी अंधारात पोबारा केला.
हा हल्ला चोरीच्या उद्देशाने, जमिनीवरून वादावरून का वैयक्तिक वैमनस्यातून झाला, हे अद्याप समोर आलेले नाही. पोलिस या सर्व शक्यता गृहीत धरून तपास करत आहे. घटनास्थळी श्‍वानपथकाला पाचारण करण्यात आले होते.
चोरीच्या उद्देशाने हा हल्ला झाला की शेतीच्या वादातून? या अनुषंगाने आमचा तपास सुरू आहे. फिर्यादीने व्यक्त केलेल्या संशयावरून आम्ही संबंधितांकडे चौकशी करत असल्याचे पोलिसांनी सांगितले.
यवतचे पोलिस निरीक्षक नारायण देशमुख, स्थानिक गुन्हे शाखेचे पोलिस निरीक्षक अविनाश शिळीमकर, उपविभागीय पोलिस अधिकारी बापूराव दडस, अतिरिक्त पोलिस अधिक्षक गणेश बिरादार यांनी घटनास्थळी भेट दिली. पोलिस उपनिरीक्षक किशोर वागज तपास करीत आहेत.