पुणे, ता. १२ : हातात कोयता असलेल्या तरुणांचा घोळका पाहिल्यानंतर घाबरलेल्या तरुणाचा दुचाकी घसरून अपघात झाला. तरुण खाली कोसळताच टोळक्याने त्यांना मारहाण करून लुटल्याचा प्रकार लेकटाऊनजवळ सोमवारी (ता. १०) रात्री दहाच्या सुमारास घडला आहे. हा प्रकार पाहून नागरिक जमा झाल्यानंतर कोयतेधारी तरुणांनी दहशत निर्माण केली. याप्रकरणी पोलिसांनी अब्दुल मामू शेख (वय १९) आणि तेजस दीपक सणस (वय १९) यांना अटक केली आहे. तर, त्यांचे दोन साथीदार पसार झाले आहेत. याबाबत आनंद दरगडे (वय २९) व त्यांचा मित्र अतुल यांनी भारती विद्यापीठ पोलिस ठाण्यात तक्रार दिली आहे.