पुणे - भारतीय नौदलात (Indian Navy) अधिकारी (Officer) म्हणून काम करण्याची अनोखी संधी तरुणांना (Youth) मिळणार आहे. नौदलाच्या विविध विभागांसाठी प्रवेश प्रक्रिया (Admission Process) सुरू झाली आहे. त्यासाठी ऑनलाइन अर्ज (Online Form) प्रक्रिया सुरू झाली असून, ही प्रवेश प्रक्रिया महिला व पुरुष उमेदवारांसाठी आहे. गुरुवारपर्यंत (ता. १०) उमेदवारांना अर्ज करता येईल.

नौदलाच्या एक्झिक्युटिव्ह विभागासाठी ही प्रवेश प्रक्रिया असून, यामध्ये ५० जागा राखीव ठेवल्या आहेत. यासाठी बी.ई, बी.टेकमध्ये किमान ६० टक्के गुण असणे आवश्‍यक असून, वयोमर्यादाही देण्यात आली आहे. त्याचबरोबर एनसीसीचे सी सर्टिफिकेट असलेल्या उमेदवारांना देखील या थेट प्रवेश प्रक्रियेअंतर्गत अर्ज करता येणार आहे. या प्रक्रियेत निवड झालेल्या उमेदवारांना एझिमाला येथील इंडियन नेव्हल अकॅडमीत प्रशिक्षण दिले जाईल.

नौदलाच्या वतीने बारावी उत्तीर्ण झालेल्या पुरुष उमेदवारांसाठी कायमस्वरूपी आयोगांतर्गत (पीसी) प्रवेश प्रक्रिया सुरू केली आहे. त्यानुसार मंगळवारपर्यंत (ता. ८) इच्छुक उमेदवारांना अर्ज करता येईल. शैक्षणिक आणि तांत्रिक विभागासाठी होणाऱ्या या प्रवेश प्रक्रियेत एकूण ३५ जागा राखीव ठेवल्या आहेत. या प्रक्रियेत लेखी परिक्षा होणार नसून थेट सर्व्हिस सिलेक्शन बोर्डाच्या मुलाखतीच्या (एसएसबी) माध्यमातून निवड केली जाणार आहे. यासाठी विज्ञान शाखेत बारावी उत्तीर्ण असलेल्या उमेदवारांना अर्ज भरता येणार आहे. तसेच, बारावीत भौतिकशास्त्र, गणित आणि रसायनशास्त्र हे विषय असणे आवश्‍यक असून, जेईई परिक्षेतील गुणदेखील गृहित धरले जाणार आहेत.

या दोन्ही प्रवेश प्रक्रियेशी संबंधित अधिक माहिती व ऑनलाइन अर्ज करण्यासाठी इच्छुक उमेदवारांनी joinindiannavy.gov.in या अधिकृत संकेतस्थळाला भेट द्यावी.