भीमाशंकर, ता. २८ : ‘‘आदिवासी संस्कृतीमुळे भारताची जगाला ओळख झाली. ही संस्कृती माणसामाणसामधील अंतर कमी करते. आदिवासी संस्कृती ही जगातील सर्वात पुरातन संस्कृती आहे.’’ असे मत सुप्रसिद्ध लेखिका उषाकिरण अत्राम यांनी व्यक्त केले. ते पोखरी (ता. आंबेगाव) येथील श्री पंढरीनाथ कला, वाणिज्य व विज्ञान महाविद्यालय आयोजित आदिवासी जीवन संघर्ष आणि शाश्‍वत विकास या विषयावरील आंतर विद्या शाखीय राष्ट्रीय चर्चासत्रात बोलत होते.
कार्यक्रमाच्या अध्यक्षस्थानी बाळासाहेब कोळप हे होते. अत्राम म्हणाले, ‘‘जल, जंगल, जमीन टिकली तरच आदिवासी संस्कृती टिकेल आणि आदिवासी समाजाचा शाश्‍वत विकास होईल.’’ राष्ट्रीय चर्चासत्राचे बीजभाषक डॉ. कैलास बवले म्हणाले, ‘‘आदिवासी समाजाचा शाश्‍वत विकास घडवून आणावयाचा असेल तर आदिवासी संस्कृती व संवर्धन होणे काळाची गरज आहे.’’
या राष्ट्रीय चर्चासत्रासाठी प्रमुख पाहुणे म्हणून सुप्रसिद्ध लेखिका कुसुम अलाम यांनी आदिवासी समाजावर होणारे अन्याय, अत्याचार थांबले पाहिजेत असे नमुद केले. तर फर्ग्युसन महाविद्यालय पुणे अर्थशास्त्र विभाग प्रमुख डॉ. सुरेखा घारे यांनी ही आदिवासी शाश्‍वत विकासासाठी सर्वोत्तम प्रयत्न होणे आवश्यक आहे. राष्ट्रीय चर्चासत्रात पाबळ महाविद्यालयाचे प्राचार्य डॉ. संजय घोडेकर यांनी आपले मनोगत व्यक्त केले.
यावेळी डॉ. संदीप चपटे, डॉ. शशिकांत साळवे यांनी संपादित केलेल्या ग्रंथाचे प्रकाशन आरुश्री पब्लिकेशन सासवडच्या प्रा. पायल जगताप यांच्या हस्ते पार पडले. याप्रसंगी प्रा. डॉ. कृष्णा भवारी, डॉ. प्रल्हाद शिंदे, प्रा. रूपनारायण, डॉ. दिलीप कदम, डॉ. विक्रम जाधव, प्रा. स्वप्निल जोशी, सावित्रीबाई फुले पुणे विद्यापीठाचे माजी उपकुलसचिव सीताराम जोशी उपस्थित होते. प्रास्ताविक प्रा. प्रशीक साळवे यांनी तर सूत्रसंचालन प्रा. उज्ज्वला गगे यांनी केले.