पुणे, ता. ३ ः भारतीय संगीतातील अस्पर्शित पैलूंचे दर्शन घडविणाऱ्या ‘मुसाफिर’ या आगळ्यावेगळ्या दृकश्राव्य कार्यक्रमाचे आयोजन ‘वेध, पुणे’ आणि ‘वेध कट्टा, पुणे’ यांच्यातर्फे केले आहे. शनिवारी (ता. ४) सायंकाळी ६ वाजता मयूर कॉलनीतील महाराष्ट्र एज्युकेशन सोसायटीच्या बालशिक्षण सभागृहात हा कार्यक्रम पार पडेल.
भारतीय राग संगीत शिकण्यासाठी हजारो मैलांचे अंतर पार करून येणाऱ्या परदेशी कलाकारांचे अनुभव या कार्यक्रमात टिपण्यात आले असून भारतीय संगीतातील गुरू-शिष्य परंपरेचाही वेध घेण्यात आला आहे. दीड तास कालावधीच्या या कार्यक्रमात अभिवाचनासह काही दुर्मिळ ध्वनीचित्रफितींचाही समावेश आहे. या कार्यक्रमाचे संशोधन व संहिता वंदना अत्रे यांची असून अभिवाचन वंदना अत्रे व डॉ. चंद्रकांत संकलेचा हे करणार आहेत. रसिकांना या कार्यक्रमासाठी विनामूल्य प्रवेश असून त्यांनी अधिकाधिक संख्येने या अनोख्या प्रयोगाचा लाभ घ्यावा, असे आवाहन आयोजकांनी केले आहे.