पुणे, ता. १४ : सांडपाणी वाहून नेणाऱ्या पाइपलाइनच्या खोदकामात वारजे येथील महावितरणच्या उच्चदाब भूमिगत वीजवाहिन्या वारंवार तोडल्या जात असल्याचे समोर आले आहे. त्यामुळे आठ ते दहा दिवसांपासून या परिसरात खंडित वीजपुरवठ्याचा ग्राहकांना त्रास सहन करावा लागत आहे. या प्रकरणी महावितरणने महापालिकेला पत्र दिल्यानंतर पालिकेने संबंधित ठेकेदाराला वीजवाहिन्या दुरुस्तीचा खर्च महावितरणला देण्याचा आदेश दिले आहेत.
महावितरणने यासंदर्भात पुणे महापालिकेच्या मलनि:सारण देखभाल व दुरुस्ती विभागाला लेखी पत्र दिल्यानंतर वारजे येथील खोदकाम सुरु असलेल्या ठिकाणाची संयुक्त पाहणी केली. सांडपाणी वाहून नेणारी पाइपलाइन टाकण्यासाठी पुणे महापालिकेच्या ठेकेदाराकडून जेसीबीद्वारे वारजे परिसरात खोदकाम सुरू आहे. मात्र, संबंधित ठेकेदाराने याबाबत महावितरणच्या स्थानिक कार्यालयांना पूर्वकल्पना दिली नाही. यामध्ये १ ते ८ मार्च दरम्यान वारजे ब्रीज, खानवस्ती, वारजे वाहतूक पोलिस चौकी, रामनगर तसेच वारजे पाणीपुरवठा याठिकाणी २२ केव्हीच्या भूमिगत वीजवाहिन्या तोडल्या होत्या. परिणामी पुणे मेट्रो, डहाणूकर कॉलनी, प्रथमेश सोसायटी, भुजबळ टाऊनशिप, डुक्करखिंड परिसर, खानवस्ती, हिंदुस्थान बेकरी, रामनगर आदी परिसरात सुमारे चार हजार वीजग्राहकांना दोन तासांपर्यंत खंडित वीजपुरवठ्याचा त्रास सहन करावा लागला तर उर्वरित ठिकाणी महावितरणने पर्यायी व्यवस्थेतून वीजपुरवठा सुरळीत ठेवला होता.