पुणे, ता. २० : पुणे जिल्ह्यात २०२१-२२ या वर्षाच्या तुलनेत या गेल्या वर्षी (२०२२-२३) देशी मद्याच्या विक्रीत तब्बल १५ टक्के, विदेशी मद्यविक्रीत २३ टक्के आणि बिअर विक्रीत ५१ टक्के वाढ झाली आहे. याशिवाय वाइन विक्रीमध्ये ३१ टक्के इतकी वाढ झाली. राज्य उत्पादन शुल्क विभागाला सरत्या आर्थिक वर्षात मिळालेल्या महसूलावरून ही माहिती समोर आली आहे.

गेल्या आर्थिक वर्षात (२०२२-२३) २ हजार २२४.८२ कोटी रुपयांचा महसूल राज्य उत्पादन शुल्क विभागाला मिळाला. अवैधरित्या गोवा राज्यातून उत्पादन शुल्क बुडवून महाराष्ट्रात वाहतूक केल्याप्रकरणी गेल्या वर्षभरात २१ गुन्हे दाखल करून ४२ आरोपींना अटक करण्यात आली आहे. त्यामध्ये १९ वाहने जप्त करून आठ कोटी ६४ लाख ४५ हजार १६९ रुपयांचा मुद्देमाल जप्त करण्यात आला आहे. तर अवैधरित्या ढाब्यांवर मद्य सेवन केल्याप्रकरणी १३४ प्रकरणांची नोंद करण्यात आली असून न्यायालयाकडून २९० आरोपींना दोषी ठरवून शिक्षा ठोठावण्यात आली आहे. त्यांच्याकडून दंडापोटी ३ लाख ९६ हजार ९०० रुपयांचा दंड वसूल करण्यात आला आहे, अशी माहिती राज्य उत्पादन शुल्क पुणे विभागाचे अधीक्षक सी. बी. राजपूत यांनी दिली.

वर्ष - महसूल (रुपयांत)
२०२१-२२ - १ हजार ८५५.८२ कोटी
२०२२-२३ - २ हजार २२४.८२ कोटी
(आकडेवारी - राज्य उत्पादन शुल्क विभाग)

उत्पादन शुल्क पुणे विभाग
दाखल गुन्हे - २ हजार ६५८
अटकेतील आरोपी - २ हजार ९४७
जप्त मुद्देमाल (रुपये) - १८ कोटी १४ लाख १९ हजार १७७
(२०२२-२३ आकडेवारी)

तक्रारीसाठी संपर्क क्रमांक
अवैध मद्यनिर्मिती, वाहतूक आणि विक्री यांबाबत यापुढेही नियमित कारवाई सुरू राहणार आहे. शहरासह जिल्ह्यात कोणत्याही नागरिकास अवैध मद्यनिर्मिती, वाहतूक व विक्री याबाबत माहिती मिळाल्यास टोल फ्री क्रमांक १८००२३३९९९९ आणि दूरध्वनी क्रमांक ०२०-२६०५८६३३ या क्रमांकावर संपर्क साधावा, असे आवाहनही राजपूत यांनी केले.