पुणे, ता. १८ : रेशनकार्ड (शिधापत्रिका) हवी आहे. त्यासाठी रेशन कार्यालयात जाण्याची, तेथे एजंटला धरून पैसे खाऊ घालण्याची गरज नाही. कारण, रेशन कार्ड हवे असल्यास ते आता ऑनलाइन आणि निःशुल्क (मोफत) उपलब्ध करून देण्याचा निर्णय राज्य सरकारने घेतला आहे.

अनेक तहसील कार्यालयांमध्ये तसेच परिमंडळ कार्यालयांमध्ये एजंटांचा सुळसुळाट झाला होता. त्यात अनेक अधिकारी देखील सामील होते. त्यामुळे वीस रुपयात मिळणाऱ्या रेशन कार्डसाठी एक ते दोन हजार रुपयांपर्यंत मोजावे लागत होते. याला आता आळा बसणार आहे. राज्य सरकारने बुधवारी याबाबतचे आदेश जारी केले. शासन निर्णयानुसार आता सामान्यांना ऑनलाइन पद्धतीने रेशन कार्ड काढता येणार आहे. त्यासाठी कोणतीही शुल्क द्यावे लागणार नाही. ऑनलाइन पद्धतीने अर्ज केल्यानंतर ही माहिती संबंधित जिल्हा पुरवठा अधिकारी किंवा अन्नधान्य वितरण अधिकाऱ्याकडे जमा होणार आहे. त्यानंतर अर्जदार हा नेमका कुठल्या प्रकारातील आहे, यावरून त्याचे रेशन कार्ड किती दिवसात मिळेल हे ठरणार आहे.
यावर रेशन कार्ड दुकानदार संघटनेचे अध्यक्ष गणेश डांगी म्हणाले, ‘‘रेशन कार्ड काढण्यासाठी पूर्वी अधिकाऱ्यांसह कर्मचाऱ्यांसह एजंटांची लॉबी होती. या ऑनलाइन सुविधेमुळे ही लॉबी तुटणार आहे.’’

या कालावधीत मिळणार कार्ड
जर अर्जदार अंत्योदय योजनेतील किंवा राष्ट्रीय अन्नसुरक्षा योजनेतील असल्यास पूर्वीप्रमाणेच त्यासाठी रेशन अधिकाऱ्यांना व कर्मचाऱ्यांना त्याच्या कुटुंबाचा सर्व्हे करावा लागणार आहे. त्यामुळे असे रेशन कार्ड देताना पूर्वीचीच २० दिवसांची मुदत असणार आहे. पांढरे रेशन कार्ड काढायचे असल्यास त्याला पूर्वी सात दिवस लागायचे, आता देखील याच मुदतीत ते कार्ड मिळणार आहे. रेशन कार्ड मान्य झाल्यानंतर त्याला ते ऑनलाईनच डाउनलोड करता येणार आहे. त्यात त्याचे कार्ड कोणत्या दुकानदाराला नेमण्यात आलेला आहे. याचा देखील उल्लेख असणार आहे.

‘‘या निर्णयामुळे सामान्यांना होणारा त्रास वाचणार आहे. माहिती ऑनलाईनच उपलब्ध झाल्याने पुढील सोपस्कार कमी होणार आहेत.’’
- सुरेखा माने, जिल्हा पुरवठा अधिकारी