पुणे, ता. ८ : ‘स्वातंत्र्याचा अमृत महोत्सव’ सांगता सोहळ्यानिमित्त जिल्ह्यात ९ ऑगस्ट ते १४ ऑगस्ट दरम्यान ‘मेरी माटी मेरा देश’ उपक्रम राबविण्यात येणार आहे. याचा एक भाग म्हणून जिल्ह्यातील सर्व शासकीय कार्यालयात ९ ऑगस्टला सकाळी १० वाजता पंचप्राण शपथ घेण्यात येणार असल्याची माहिती जिल्हाधिकारी डॉ. राजेश देशमुख यांनी दिली.

‘मेरी माटी मेरा देश’ उपक्रमांतर्गत वसुधा वंदन, स्वातंत्र्यसैनिक वीरांना वंदन, पंचप्राण शपथ, ध्वजारोहण कार्यक्रम आयोजित करण्यात यावेत. वसुधा वंदन उपक्रमासाठी प्रत्येक ग्रामपंचायत स्तरावर ७५ वृक्षांची लागवड करून अमृत वाटिका तयार करण्यात येणार आहेत. शालेय प्रांगणात मातृभूमीची सुरक्षा आणि तीच्या गौरवाच्या रक्षणाकरिता वीरांनी दिलेल्या बलिदानाची माहिती जनतेला मिळावी, यासाठी शिलाफलक लावण्यात येणार आहे. तसेच स्थानिक स्वराज्य संस्थेच्या कार्यक्षेत्रातील लष्कर किंवा पोलिस दलातील निवृत्त अधिकारी-कर्मचारी, स्वातंत्र्यसैनिकांच्या परिवारातील सदस्यांचा सन्मान करण्यात येईल, असेही देशमुख म्हणाले.

सेल्फी अपलोड करता येणार
पंचप्राण शपथ घेण्यासाठी बचतगटाच्या माध्यमातून तयार केलेले मातीचे दिवे शिधावाटप दुकानात उपलब्ध करून देण्यात येतील. मागील वर्षाप्रमाणे यावर्षीही १३ ते १५ ऑगस्ट या कालावधीत ‘घरोघरी तिरंगा’ हा उपक्रम राबविण्यात येईल. अभियानात नागरिकांचा सहभाग वाढविण्यासाठी https://merimaatimeradesh.gov.in/ हे संकेतस्थळ सुरू करण्यात आले आहे. या संकेतस्थळावर शपथ घेताना मातीचा दिवा किंवा माती हाती धरून काढलेले सेल्फी अपलोड करता येतील.