आरोग्य योजनेसाठी उत्पन्न मर्यादा वाढणार
महापालिकेच्या आरोग्य विभागाचा स्थायी समितीला प्रस्ताव
पुणे, ता. ३ : शहरी गरीब आरोग्य योजनेसाठी वार्षिक उत्पन्नाची मर्यादा एक लाखावरून एक लाख ६० हजार रुपयांपर्यंत वाढविण्याचा प्रस्ताव महापालिकेच्या आरोग्य विभागाने स्थायी समितीसमोर ठेवला आहे.
महापालिकेच्या हद्दीतील आर्थिकदृष्ट्या दुर्बल घटकांतील नागरिकांना रुग्णालयांत चांगले उपचार मिळावेत या उद्देशाने २०१० मध्ये ही योजना सुरु करण्यात आली. या योजनेत शहरातील १४० खासगी रुग्णालयांचा समावेश करण्यात आला. रुग्णालयांतील उपचारांचे दर वाढत असताना दीड ते दोन लाख रुपये उत्पन्न असणाऱ्या नागरिकांना या योजनेचा लाभ घेता येत नव्हता. उपचार घेण्यासाठी गैरप्रकार होत असल्याचे आरोग्य विभागाच्या निदर्शनास आले होते. त्यामुळे हा प्रस्ताव मांडण्याचे ठरले. तो मान्य झाल्यानंतर आणखी रुग्णांना योजनेचा फायदा होईल.
---

असे मिळतात उपचार
शहरी गरीब आरोग्य योजनेच्या पोर्टलवर कुटुंबाची माहिती भरून कागदपत्रे अपलोड करावी लागतात. अटींची पूर्तता झाल्यास महापालिकेकडून शहरी गरीब कार्ड देण्यात येते. महापालिकेच्या पॅनेलवरील १४० रुग्णालयांत ते स्वीकारले जाते. कार्ड दाखविल्यानंतर महापालिका प्रशासनाकडून ऑनलाइन पूर्वमान्यता घेतली जाते. ती मिळाल्यानंतर मूत्रपिंड, हृदयविकार, कर्करोग यांसह इतर गंभीर आजारांवर उपचाराची सुविधा उपलब्ध केली जाते.
---
योजनेची सद्यःस्थिती (२०२३-२४)
- आत्तापर्यंत प्राप्त अर्ज ः ११ हजार ५९१
- नागरिकांना देण्यात आलेली कार्ड ः ९,८०९
- उत्पन्न मर्यादा वाढल्यास किती जणांना फायदा ः सुमारे ५०००
-----
शहरी गरीब आरोग्य योजना गरीब कुटुंबासाठी योजना महत्त्वाची ठरत आहे. याचा लाभ आणखी नागरिकांना मिळावा म्हणून उत्पन्न मर्यादा वाढविण्याचा प्रस्ताव आहे. आत्तापर्यंत सुमारे दहा हजार नागरिकांना शहरी गरीब कार्ड देण्यात आली आहेत. आणखी दीड हजार कार्ड तयार असून नागरिकांनी त्यांची कार्ड घ्यावीत.
- मनीषा नाईक, सहायक आरोग्य अधिकारी, पुणे महापालिका
-----