पुणे, ता. ३१ : पंतप्रधान कार्यालयात (पीएमओ) सचिव पदावर गोपनीय विभागात कार्यरत असल्याचे भासविणाऱ्या तोतया आयएएस अधिकाऱ्याला गुन्हे शाखा युनिट एकच्या पथकाने अटक केली. हा तोतया अधिकारी उच्चशिक्षित असून, पुण्यात एका कार्यक्रमासाठी पाहुणे म्हणून आल्यानंतर त्याचे बिंग फुटले. वासुदेव निवृत्ती तायडे (वय ५४, रा. रानवारा रो हाऊस, तळेगाव दाभाडे) असे त्याचे नाव आहे.

पोलिसांनी दिलेल्या माहितीनुसार, औंध येथील सिंध हाउसिंग सोसायटीमध्ये २९ मे रोजी बॉर्डर लेस वर्ल्ड फाउंडेशन संस्थेच्या वतीने कार्यक्रमाचे आयोजन केले होते. जम्मू काश्मीर येथे मदतीसाठी रुग्णवाहिका पाठविण्याचा लोकार्पण सोहळा होता. या कार्यक्रमात पाहुणे म्हणून आलेल्या एका व्यक्तीने त्याचे नाव डॉ. विनय देव असल्याचे सांगून, आपण आयएएस असल्याची बतावणी केली. तसेच दिल्ली येथे पंतप्रधान कार्यालयात सचिव पदावर कार्यरत असल्याचे सांगितले. चर्चेदरम्यान संस्थेच्या पदाधिकाऱ्यांना या अधिकाऱ्यावर संशय आल्याने त्यांनी ही बाब गुन्हे शाखेकडे बोलून दाखवली. त्यानंतर गुन्हे शाखेच्या युनिट एकच्या पोलिसांनी या तोतयाला तळेगाव दाभाडे येथील घरातून ताब्यात घेतले.

पोलिस आयुक्त रितेश कुमार, पोलिस सहआयुक्त संदीप कर्णिक, अतिरिक्त आयुक्त रामनाथ पोकळे, पोलिस उपायुक्त अमोल झेंडे, सहायक आयुक्त सुनील पवार यांच्या मार्गदर्शनाखाली युनिट एकचे वरिष्ठ पोलिस निरीक्षक शब्बीर सय्यद, पोलिस अंमलदार राहुल मखरे, इम्रान शेख, अभिनव लडकत, नीलेश साबळे यांच्या पथकाने ही कारवाई केली.

हा तोतया अधिकारी मूळचा भुसावळ येथील असून तो बी. कॉम. आणि एम.ए पदवीप्राप्त आहे. त्याने यूपीएससीची परीक्षाही दिली होती, परंतु तो त्यात अपयशी ठरला. त्याने डॉ. विनय देव हे नाव धारण केले होते. आय. ए. एस अधिकारी असल्याचे भासवून तो कार्यक्रमांना प्रमुख पाहुणा म्हणून हजेरी लावत होता. आणखी कोणाची फसवणूक झाली असल्यास संबंधितांनी तक्रार द्यावी.
- अमोल झेंडे, पोलिस उपायुक्त- गुन्हे शाखा