पुणे, ता. १५ : १२ ज्योर्तिलिंग दर्शन, नृसिंह अवतार, सरस्वती महल अशा धर्मिक देखाव्यांसह महिलांवरील अत्याचाराविरोधातील ‘स्त्री शक्तीचा जागर’, ‘मनोगत पुण्याचे अर्थात विद्येच्या माहेर घराचे’ अशा खडकी, औंध परिसरातील एकाहून अधिक सरस देखाव्यांनी भाविकांचे लक्ष वेधले आहेत.
खडकीतील मधला बाजार मित्रमंडळ ट्रस्टने आणि शिवप्रताप तरुण मंडळाने फुलांची आकर्षक सजावट केली आहे. नवी तालीम नूतन तरुण मंडळाने यंदा ‘१२ ज्योर्तिलिंग दर्शन’ हा देखावा सादर केला आहे. धोबी गल्ली मित्रमंडळाने यंदा आकर्षक महल साकारला आहे. डेपो लाइन मित्रमंडळाचा ‘नृसिंह अवतार’ हा देखावा वैशिष्ट्यपूर्ण ठरत आहे. श्रीदत्त तरुण मंडळ ट्रस्टने यंदा ‘सरस्वती महल’ बनविला आहे. गवळीवाडा तरुण मंडळाने ‘आरक्षण दिले पण संरक्षणाचं काय’ या विषयावर जिवंत देखावा सादर केला आहे.
खडकीतील द नॅशनल यंग क्लबने ‘स्त्री शक्तीचा जागर’ हा जिवंत देखावा साकारला आहे. विकास तरुण मंडळाने ‘मनोगत पुण्याचे अर्थात विद्येच्या माहेरघराचे’ हा जिवंत देखावा सादर केला आहे. औंध येथील कै. पिट्या ऊर्फ किरण सूर्यवंशी प्रतिष्ठानने यंदा एलईडी स्क्रीनच्या माध्यमातून वेगवेगळ्या राज्यांतील महलांचे ग्राफिकद्वारे सादरीकरण केले आहे.

आवर्जून पाहावेत असे देखावे
- नवी तालीम नूतन तरुण मंडळाने सादर केलेले ‘१२ ज्योतिर्लिंग दर्शन’
- द नॅशनल यंग क्लब महिलांवरील अत्याचाराविरोधातील ‘स्त्री शक्तीचा जागर’ हा जिवंत देखावा
- विकास तरुण मंडळाने फलकांद्वारे साकारलेला ‘मनोगत पुण्याचे अर्थात विद्येच्या माहेरघराचे’ हा जिवंत देखावा
- डेपोलाइन मित्र मंडळाने सादर केलेला ‘नृसिंह अवतार’ हा देखावा
- कै. पिट्या ऊर्फ किरण सूर्यवंशी प्रतिष्ठानने एलईडी स्क्रीनद्वारे सादर केलेले राज्यातील महलांचे ग्राफिक