पुणे, ता. ११ : आपला परिसर, तरंगिणी सांस्कृतिक प्रतिष्ठान आणि महापालिकेतील माजी विरोधी पक्ष नेते उज्ज्वल केसकर यांच्यातर्फे १९ व्या ‘पं. जितेंद्र अभिषेकी संगीत महोत्सवा’चे आयोजन करण्यात आले आहे. २१ ते २३ मार्च या कालावधीत हा महोत्सव कोथरूडच्या यशवंतराव चव्हाण नाट्यगृहात होणार आहे, अशी माहिती केसकर आणि पं. जितेंद्र अभिषेकी यांचे पुत्र व शिष्य पं. शौनक अभिषेकी यांनी मंगळवारी पत्रकार परिषदेत दिली.
याप्रसंगी पं. जितेंद्र अभिषेकी यांचे शिष्य पं. हेमंत पेंडसे, ‘आपला परिसर’ संस्थेचे महेश पानसे आदी उपस्थित होते. २१ मार्चला सायंकाळी ५ वाजता ‘हे बंध रेशमाचे’ हा कार्यक्रम शौनक अभिषेकी, डॉ. सलिल कुलकर्णी, संदीप खरे आणि वैभव जोशी हे सादर करणार आहेत. २२ आणि २३ मार्चला सायंकाळच्या सत्रात ज्येष्ठ कथक नर्तक पं. राजेंद्र गंगाणी, गायिका इंद्राणी मुखर्जी, ज्येष्ठ गायक पं. मधुप मुदगल, समीर दुबळे, संतूरवादक अभय सोपोरी आणि भजनसम्राट अनुप जलोटा यांचे सादरीकरण होणार आहे. या दोन्ही दिवशी सकाळी ९ वाजता युवा कलाकारांचे सादरीकरण होणार असून त्यात करण देवगांवकर, अमन वरखेडकर, श्रुती विश्वकर्मा, रागेश्री वैरागकर, ईशान घोष आणि अनिरुद्ध ऐठ्ठल यांचे सादरीकरण होणार आहे. हा महोत्सव सर्वांसाठी खुला आहे.

महोत्सवानिमित्त देण्यात येणारा ‘पं. जितेंद्र अभिषेकी पुरस्कार’ यंदा ज्येष्ठ गायक शेखर साने यांना जाहीर झाला असून ज्येष्ठ संगतकार पुरस्कार तबलावादक सुभाष कामत यांना जाहीर झाला आहे. तसेच, ‘विद्या जितेंद्र अभिषेकी पुरस्कार’ लेखिका शैला मुकुंद यांना देण्यात येणार असून यशस्वी संयोजक पुरस्कार राजेश गोडबोले यांना प्रदान केला जाणार आहे, असे केसकर यांनी सांगितले.