पुणे, ता. २२ ः पुणे विमानतळावर आपल्या आई-वडिलांसमवेत येणाऱ्या लहान मुलांना विमानाची तासनतास वाट पाहणे हे कंटाळवाणे तर होतेच, त्यामुळे त्यांची चिडचिडदेखील होते. याचा परिणाम पालकांवरदेखील होतो. हे लक्षात घेऊन विमानतळाच्या ‘सेक्युरिटी होल्ड एरिया’मध्ये ‘चिल्ड्रन्स प्ले एरिया’ विकसित केला आहे. त्याला आता मुलांचा चांगला प्रतिसाद लाभत आहे. मुलांना येथे मनसोक्त खेळता येत आहे. शिवाय त्यासाठी पालकांना कोणतेही शुल्क द्यावे लागत नाही.

पुणे विमानतळावर विमानाची वाट पाहत बसणाऱ्या प्रवाशांसाठी विमानतळ प्रशासनाने विविध उपक्रम सुरू केले आहेत. ज्या प्रवाशांना वाचनाची आवड आहे, अशा प्रवाशांसाठी विमानतळाच्या पहिल्या मजल्यावर ‘रीडिंग झोन’ तयार करण्यात आला आहे. येथे प्रवाशांना मराठी, हिंदी व इंग्रजीमध्ये पुस्तके उपलब्ध आहेत. प्रवासी येथे बसून कोणतेही पुस्तके वाचू शकतात. येथे सुमारे २०० पुस्तके उपलब्ध आहेत. यासाठी कोणतेही शुल्क आकारले जात नाही, तसेच कंटाळा आलेल्या मुलांसाठी ‘चिल्ड्रन्स प्ले एरिया’ तयार केला आहे. यालादेखील लहान मुलांचा चांगला प्रतिसाद लाभत आहे. या कक्षामध्ये लहान मुलांसाठी विविध प्रकारची खेळणी उपलब्ध आहेत. यामध्ये रंगीत ब्लॉक्स, स्लाइड, विविध प्रकारचे खेळ आणि इतर मनोरंजक खेळणी आहेत. मुलांसाठी हे खेळ विनामूल्य उपलब्ध आहेत, त्यामुळे पालकांना कोणताही अतिरिक्त खर्च करावा लागत नाही. विमानतळाची नवीन इमारत कार्यान्वित झाली तेव्हा त्याला फारसा प्रतिसाद लाभत नव्हता, आता मात्र त्याला चांगला प्रतिसाद लाभत आहे.
-----------------
विमानतळावर प्रवाशांच्या करमणुकीचे विविध उपक्रम सुरू आहेत. यात वाचनालयापासून ते लहान मुलांसाठी खेळण्यासाठी ‘प्ले एरिया’ तयार केला आहे. याला प्रवाशांचा खूप चांगला प्रतिसाद लाभत आहे. यासाठी कोणतेही शुल्क आकारले जात नाही.
- संतोष ढोके, विमानतळ संचालक, पुणे