पुणे, ता. २२ : गुन्हे शाखेने पद्मावती भागात केलेल्या कारवाईत स्वारगेट पोलिस ठाण्यातील एक पोलिस अंमलदारच गांजा विक्री प्रकरणात सहभागी असल्याची धक्कादायक बाब समोर आली आहे. नवनाथ कांताराम शिंदे असे त्या पोलिस अंमलदाराचे नाव आहे. या प्रकरणाच्या चौकशीनंतर पोलिस उपायुक्त मिलिंद मोहिते यांनी त्या पोलिस अंमलदारास निलंबित केले.
गुन्हे शाखेच्या युनिट पाचचे पोलिस निरीक्षक संजय पतंगे यांच्या पथकाने पद्मावती परिसरात केलेल्या कारवाईत प्रतीक आंत्वन पवार याला गांजासह ताब्यात घेतले. त्याच्याकडून पाच किलो २६० ग्रॅम गांजा जप्त करण्यात आला. चौकशीत सौरभ कट्टीमणी ऊर्फ पाटील, सागर चव्हाण ऊर्फ डागाभाई, अभिजित सावंत यांनी प्रतीक पवार आणि संदीप ऊर्फ सॅण्डी घोटे यांना गांजा विक्रीसाठी दिल्याचे समोर आले. याप्रकरणी सहकारनगर पोलिस ठाण्यात गुन्हा दाखल करण्यात आला होता.
तपासादरम्यान या अवैध धंद्यामागे पोलिस अंमलदार नवनाथ शिंदे याचे नाव समोर आले. प्रतीक पवारच्या मोबाईलमध्ये शिंदे याचा क्रमांक आढळून आला. शिंदे स्वारगेट पोलिस ठाण्यात कार्यरत असताना सहकारनगर आणि पद्मावती परिसरातील अवैध धंद्यांना पाठबळ देत असल्याचे निष्पन्न झाले. शिंदे याचे वर्तन पोलिस दलाची प्रतिमा मलिन करणारे असल्याने परिमंडळ दोनचे पोलिस उपायुक्त मिलिंद मोहिते यांनी त्याला शासकीय सेवेतून निलंबित करण्याचा आदेश दिला.