धनकवडी, ता. २५ : क्रांतिसूर्य महात्मा जोतिबा फुले (तीन हत्ती चौक) येथे असलेल्या ‘छत्रपती संभाजी महाराजांची जंजिरा स्वारी’ या म्युरलची आणि बैठक व्यवस्थेची गेल्या अनेक दिवसांपासून दुरवस्था झाली आहे. त्यामुळे प्रशासनाने तत्काळ दुरुस्ती करावी, अशी मागणी नागरिकांनी केली आहे.
ऐतिहासिक प्रसंग सांगणारे १२० फूट लांब व सात फूट उंचीचे संभाजी महाराजांचे म्युरलमधील काही पुतळ्यांचे रंग उडाले असून, त्यातील काही मूर्ती भंगलेल्या अवस्थेत आहेत. त्यांची दुरुस्ती करायला मात्र प्रशासनाला वेळ नाही, तसेच परिसराचे अनेक वर्षांपासून सुशोभीकरण झालेले नाही. येथे कारंजे पाहण्यासाठी नागरिकांना स्टेडियमसारखी उभारलेली बैठक व्यवस्था आहे. मात्र, कट्टे फुटलेल्या अवस्थेत आहे. बऱ्याच कट्ट्यांची वाळू निघाल्याने फरशा निखळल्या आहेत. येथे दररोज सायंकाळी ७ ते रात्री ११ या वेळेत धनकवडी व सहकारनगर भागातील साधारण शंभर ते दीडशे नागरिकांची गर्दी असते. यामध्ये स्पर्धा परीक्षेचे विद्यार्थी, महिला, लहान मुले आणि ज्येष्ठ नागरिक मोठ्या प्रमाणात असतात. ज्येष्ठ नागरिक आणि महिलांच्या विविध ग्रुपचे सदस्य रोज गप्पा मारण्यासाठी जमतात. त्यामुळे येथील कट्ट्याची दुरुस्ती प्रशासनाने लवकरात लवकर करावी, अशी मागणी येथील नागरिकांनी केली आहे. येथील कारंजेही अनेक वर्षापासून बंद पडले असून, सुशोभीकरण झाले नाही. येथील बेटांमध्ये वाढणारे गवत आणि झुडपांना वेळेत काढण्याची तसदी महापालिकेने कधीही घेतली नाही. खाद्यपदार्थ विक्रेत्यांनी तर चौकाची चौपाटी केली आहे.
नागरिक अर्चना पाटील म्हणाल्या, ‘‘तीन हत्ती चौकातील बसण्याची व्यवस्था असलेले कट्टे अनेक दिवसांपासून फुटलेले आहेत. ऐतिहासिक प्रसंग सांगणारे म्युरलमधील काही पुतळ्यांचे रंग उडालेले आहेत.’’
धनकवडी सहकारनगर क्षेत्रीय कार्यालयाच्या सहायक आयुक्त सुरेखा भणगे म्हणाल्या, ‘‘पावसाचा अंदाज घेऊन म्युरलची आणि बैठक व्यवस्थेची पाहणी करून तांत्रिक बाबी तपासल्या जातील. त्यानंतर येथील दुरुस्ती आणि सुशोभीकरण केले जाईल.’’

फोटो ः 38040