पुणे, ता. १८ ः ‘बंदी घातलेल्या दहशतवादी संघटनेच्या खात्यात तुमच्या बँक खात्यातून पैसे हस्तांतरित करण्यात आले आहेत. या प्रकरणात अटक करण्यात येणार आहे,’ अशी भीती दाखवून सायबर चोरट्यांनी एका ज्येष्ठ महिलेची १० हजार रुपयांची फसवणूक केली. याप्रकरणी सायबर चोरट्यांवर उत्तमनगर पोलिसांकडून गुन्हा दाखल करण्यात आला आहे.

याबाबत एका महिलेने उत्तमनगर पोलिस ठाण्यात फिर्याद दिली आहे. तक्रारदार महिला उत्तमनगर भागात राहायला आहेत. सायबर चोरट्यांनी शनिवारी (ता. १६) तक्रारदार महिलेच्या मोबाइल क्रमांकावर फोन केला. ‘डाटा प्रोटेक्शन बोर्ड ऑफ इंडिया’च्या मुंबई कार्यालयातून बोलत असल्याची बतावणी चोरट्यांनी केली. तक्रारदार महिलेच्या बँक खात्याचा वापर बंदी घातलेल्या दहशतवादी संघटनेसाठी झाला आहे. या खात्यात महिलेच्या खात्यातून मोठी रक्कम हस्तांतरित करण्यात आली आहे. या प्रकरणात अटक करण्यात येणार आहे, अशी भीती दाखवून चोरट्यांनी महिलेच्या आधार कार्डची प्रत मोबाईलद्वारे मागवून घेतली. त्यानंतर महिलेला धमकावून चोरट्यांनी एका खात्यात पैसे जमा करण्यास सांगितले. दरम्यान, महिलेने चौकशी केली. तेव्हा फसवणूक करण्यात आल्याचा प्रकार उघडकीस आला. त्यानंतर महिलेने पोलिसांकडे तक्रार दिली. वरिष्ठ पोलिस निरीक्षक मोहन खंदारे तपास करत आहेत.