पुणे, ता. १८ ः भरधाव वाहनाच्या धडकेत पादचारी तरुणाचा मृत्यू झाल्याची घटना नगर रस्त्यावरील वाघोली भागात घडली. अपघातानंतर पसार झालेल्या वाहनचालकावर गुन्हा दाखल करण्यात आला आहे.
विश्वनाथ सुभाष मोकलवार (वय ३३, रा. जीवनतारा हॉस्पिटलजवळ, आव्हाळवाडी रस्ता, वाघोली) असे मृत्युमुखी पडलेल्या पादचाऱ्याचे नाव आहे. या प्रकरणी वाहनचालकावर गुन्हा दाखल करण्यात आला आहे. रेणुका विश्वनाथ मोकलवार यांनी वाघोली पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, विश्वनाथ आणि त्यांचा लहान भाऊ युवराज हे नगर रस्त्यावरील वाघोली परिसरातून शनिवारी (ता. १६) रात्री पावणेनऊच्या सुमारास निघाले होते. रस्ता ओलांडत असताना विश्वनाथ यांना भरधाव वाहनाने धडक दिली. अपघातानंतर वाहनचालक घटनास्थळी न थांबता पसार झाला. पोलिस उपनिरीक्षक शिवशंकर राघू या गुन्ह्याचा तपास करत आहेत.