पुणे, ता. १८ : पर्वती येथील जनता वसाहत झोपडपट्टीवासीयांना घरे न देता त्यांच्या जागेचा टीडीआर घेऊन बक्कळ पैसा कमावणे एवढाच उद्देश त्यामागे दिसत आहे. त्यामुळे तो प्रस्ताव तातडीने रद्द करून या प्रकरणाची उच्चस्तरीय चौकशी करावी, अशी मागणी शिवसेना उद्धव बाळासाहेब ठाकरे पक्षाच्या वतीने मुख्यमंत्री यांना पत्राद्वारे केली आहे.

शहर प्रमुख संजय मोरे, गजानन थरकुडे यांच्यासह अशोक हरणावळ, सूरज लोखंडे यांनी हे पत्र दिले असून, याबाबत आंदोलन उभारण्याचा इशाराही त्यांनी दिला आहे. जनता वसाहत येथील सर्व्हे क्रमांक ५१७, ५१७ (ब,क), ५१८ (पी.टी.), ५१९, ५२१(ए), ५२१(ब), ५२३, ५२१(क) या झोपडपट्टीच्या जागेवर हजारो झोपडपट्टीधारक राहत आहेत. त्यांचा पुनर्वसनाला विरोध नाही, परंतु केवळ जागेच्या मोबदल्यात टीडीआर देणे हे योग्य नाही. त्यामुळे सदर प्रकरणाची उच्चस्तरीय चौकशी करण्यात यावी. चौकशी पूर्ण होईपर्यंत जागामालक अथवा विकसक यांना कोणताही मोबदला अथवा टीडीआर देऊ नये, अशी मागणीही त्यांनी पत्रात केली आहे.