पुणे, ता. १८ : पुणे महापालिकेच्या सिंहगड रस्त्यावरील आणि ‘पीएमआरडीए’ने उभारलेल्या गणेशखिंड रस्त्यावरील उड्डाणपुलाचे काम पूर्ण झाले असले, तरी अद्याप उद्‍घाटनासाठी वेळ मिळाला नसल्याने हे पूल वाहतुकीसाठी खुले कधी होणार, असा प्रश्‍न कायम आहे, पण यामुळे सर्वसामान्य नागरिकांना रोज वाहतूक कोंडीला सामोरे जावे लागत आहे.

या दोन्ही उड्डाणपुलांचे उद्‍घाटन १५ ऑगस्टला होणार होते, पण काम अपूर्ण असल्याचे सांगत उद्‍घाटन कार्यक्रम पुढे ढकलण्यात आला. त्यानंतर २० ऑगस्ट रोजी उद्‍घाटन होणार असल्याची शक्यता वर्तवली जात होती, पण ही तारीखदेखील अंतिम झालेली नाही. महापालिकेने या कार्यक्रमासाठी मुख्यमंत्री देवेंद्र फडणवीस, उपमुख्यमंत्री अजित पवार यांची वेळ मागितलेली आहे, पण अजून त्यांची वेळ मिळालेली नाही.

या दोन्ही उड्डाणपुलांवरील पथदिवे, डांबरीकरण, रंगकाम पूर्ण झाले आहे, तसेच उड्डाणपुलाखाली शोभेची झाडे लावून सुशोभीकरण करण्यात आले आहे. त्याचप्रमाणे सेवा रस्ता व मुख्य रस्त्यावरील पादचारी मार्गांचे काम सुरू आहे. त्यामुळे उड्डाणपुलाखाली वाहतूक कोंडी होत आहे. उड्डाणपूल सुरू झाल्यानंतर या कामांना गती येऊ शकते, तसेच कोंडीही कमी होणार आहे. मात्र, उद्‍घाटनासाठी मुख्यमंत्री व उपमुख्यमंत्र्यांची वेळी कधी मिळणार, याकडे लक्ष लागले आहे.

दरम्यान, प्रशासनाने आमची तयारी पूर्ण झाली आहे, कार्यक्रमाचा निरोप न मिळाल्याने व्यासपीठ उभारणी व कार्यक्रमाची तयारी करता आलेली नाही, असे सांगण्यात आले आहे.