पुणे, ता. १८ ः खडकवासला धरण साखळीमध्ये पाणीसाठा ९१ टक्क्यांवर पोहोचला आहे. धरणसाखळीमध्ये २६.८१ अब्ज घनफूट (टीएमसी) पाणीसाठा आहे. मागील वर्षी याच तारखेला तो २६.५७ टीएमसी होता. मंगळवारी खडकवासला धरणक्षेत्रामध्ये १६ मिलिमीटर, तर पानशेतमध्ये ५९ मिलिमीटर पावसाची नोंद झाली.
पावसाने विश्रांती घेतल्याने धरणसाठ्यात मागील काही दिवसांपासून वाढ झालेली नव्हती. आता पुन्हा एकदा पावसाने दमदार सुरुवात केल्यानंतर धरणसाठ्यांमध्ये वाढ होण्यास सुरुवात झाली आहे. खडकवासला धरणसाखळीमध्ये सध्या ९१.९७ टक्के पाणीसाठा जमा झाला आहे. सोमवारी (ता. १८) सायंकाळी पाच वाजेपर्यंतच्या आकडेवारीनुसार खडकवासला धरणात १.०८ टीएमसी, पानशेत धरणात १०.१० टीएमसी, वरसगाव १२.०५ टीएमसी आणि टेमघरमध्ये ३.५७ टीएमसी पाणीसाठा आहे. पानशेत, वरसगाव धरणातून पाण्याचा विसर्ग सुरू करण्यात आला आहे, तर जिल्ह्यातील कळमोडी, चासकमान, वडीवळे, भाटघर, नाझरे ही धरणे शंभर टक्के क्षमतेने भरली आहेत. याशिवाय उजनी धरणही पूर्ण क्षमतेने भरले आहे.

दृष्टिक्षेपात
धरण -- पाऊस (मिमी) -- पाणीसाठा (टीएमसी)
खडकवासला -- १६ -- १.०८
पानशेत -- ५९ -- १०.१०
वरसगाव -- ५४ -- १२.०५
टेमघर -- ४२ -- ३.५७