पुणे, ता. १८ : जिल्हा परिषदेच्या गट आणि पंचायत समितीच्या गणांच्या प्रारूप रचनेवर प्राप्त झालेल्या ११५ हरकती व सूचना विभागीय आयुक्त डॉ. चंद्रकांत पुलकुंडवार यांनी मान्य केल्या होत्या. त्यांनी सुचवलेले बदल जिल्हा प्रशासनाने केले असून, अंतिम आराखडा मान्यतेसाठी पुन्हा विभागीय आयुक्तांकडे पाठवण्यात आला आहे.
जिल्हा परिषदेच्या ७३ गट आणि पंचायत समितीच्या १४६ गणांच्या रचनेचा प्रारूप आराखडा १४ जुलै रोजी जिल्हा प्रशासनाकडून प्रसिद्ध झाला होता. त्यावर हरकती आणि सूचना मागवल्या होत्या. जिल्ह्यातून एकूण २१७ हरकती प्राप्त झाल्या होत्या.
प्रारूप रचनेवर जिल्हा प्रशासनाकडे आलेल्या हरकती आणि सूचनांवर संबंधित तहसीलदार आणि प्रांताधिकाऱ्यांकडून अभिप्राय मागवण्यात आला होता. हा अहवाल विभागीय आयुक्त डॉ. पुलकुंडवार यांना सादर झाला. या हरकती आणि सूचनांवर सुनावणी घेतल्यानंतर, विभागीय आयुक्तांनी ११५ हरकती आणि सूचना मान्य केल्या आहेत.
त्यानंतर जिल्हा प्रशासनाने विभागीय आयुक्तांनी सुचवलेले बदल करून, सुधारित आराखडा पुन्हा त्यांच्याकडे पाठवला आहे. विभागीय आयुक्त सुचवलेले बदल अचूक केले आहेत का, हे तपासातील. त्यानंतर २२ ऑगस्टनंतर ते अंतिम आराखड्याला मान्यता देतील. त्यानंतर ही अंतिम रचना प्रसिद्ध केली जाईल, असे जिल्हा प्रशासनाकडून सांगण्यात आले.