पुणे, ता. ७ : ‘सकाळ माध्यम समूहा’तील ‘सकाळ सोशल फाउंडेशन’च्या वतीने आणि ‘देवदत्त फोटोग्राफी स्कूल’च्या सहकार्याने आषाढीवारीवर आधारित आयोजित केलेल्या ‘इंद्रायणी ते चंद्रभागा- एक चित्रप्रवास’ या छायाचित्र स्पर्धेतील विजेत्यांना सकाळ सोशल फाउंडेशनचे विश्वस्त महेंद्र पिसाळ व देवदत्त फोटोग्राफी स्कूलचे देवदत्त कशाळीकर यांच्या हस्ते एकूण ५० हजार रुपयांची पारितोषिके प्रदान करण्यात आली. बालगंधर्व कलादालनात पारितोषिक वितरण समारंभ पार पडला.

‘इंद्रायणी ते चंद्रभागा- एक चित्रप्रवास’ छायाचित्र स्पर्धेत नंदुरबार येथील जयेश राजपूत यांनी पाठविलेल्या छायाचित्राने प्रथम क्रमांकाचे १५ हजार रुपयांचे पारितोषिक पटकावले. पंढरपूरचे राहुल गोडसे यांनी १० हजार रुपयांचे द्वितीय, तर धनराज कडलाख यांनी सात हजार रुपयांचे तृतीय क्रमांकाचे पारितोषिक पटकावले.
इचलकरंजीचे दशवतार बढे व कोल्हापूर जिल्ह्यातील उत्कर्ष पाटील आणि शरद पाटील या तिघांनी प्रत्येकी पाच हजार रुपयांचे अनुक्रमे उत्तेजनार्थ प्रथम, द्वितीय व तृतीय क्रमांकाचे पारितोषिक मिळविले. याशिवाय विशेष प्रयत्न म्हणून नवी मुंबईतील शुभजित मुखर्जी यांनी काढलेल्या छायाचित्रास तीन हजार रुपयांचे पारितोषिक मिळाले.
राज्याच्या विविध भागांतील सुमारे शंभरहून अधिक हौशी, अनुभवी आणि नवोदित छायाचित्रकारांनी एक हजार ८०० हून अधिक छायाचित्रे पाठवून स्पर्धेत सहभाग नोंदविला. ‘सकाळ सोशल फाउंडेशन’ आयोजित स्पर्धेचे हे सलग दहावे वर्ष होते.

छायाचित्ररूपी वारी अनुभवण्याची संधी
‘इंद्रायणी ते चंद्रभागा- एक चित्रप्रवास’ या छायाचित्र स्पर्धेतील निवडक एक हजार २०० हून अधिक निवडक छायाचित्रांचे विनामूल्य प्रदर्शन पुण्यातील बालगंधर्व कलादालनात आयोजित केले आहे. शनिवार (ता. ९) पर्यंत सकाळी १० ते सायंकाळी ६ या वेळेत हे प्रदर्शन सर्वांसाठी खुले आहे.