पुणे, ता. २८ : जिल्ह्यात काही दिवसांपासून सुरू असलेल्या जोरदार पावसामुळे अनेक ठिकाणी पूरस्थिती निर्माण झाली होती, तर अनेक गावांमध्ये पाणी साचण्याच्या घटना घडत आहेत. परिणामी डेंगी, मलेरिया, चिकुनगुनिया, कावीळ, विषमज्‍वर (टायफॉइड) यांसारख्या कीटकजन्य, जलजन्य साथीच्या आजारांचा धोका निर्माण झाला आहे. या पार्श्वभूमीवर जिल्हा परिषदेकडून सर्व तालुक्यांतील आरोग्य यंत्रणांना तातडीने प्रतिबंधात्मक उपाययोजना राबविण्याचे आदेश दिले आहेत.
जिल्ह्यातील बारामती, इंदापूर, मावळ, खेडसह इतर तालुक्यांमध्ये मोठ्या प्रमाणात पाऊस झाला. अनेक ठिकाणी पुराचे पाणी नागरिकांच्या घरात शिरले होते, तर पुराच्या पाण्यामुळे चिखलामुळे दुर्गंधीसोबत साथीचे आजार फैलावण्याची शक्यता निर्माण होते. त्यासाठी तातडीने उपाययोजना हाती घेण्यासाठीच्‍या सूचना जिल्हा परिषद प्रशासनाकडून देण्यात आल्या आहेत. पुराचे पाणी शिरलेल्या गावांमध्ये तातडीने स्वच्छता करून डासांची उत्पत्ती होऊ नये म्हणून धुराद्वारे कीटकनाशकांची फवारणी तसेच कीटकनाशक पावडर टाकण्याच्याही सूचना ही करण्यात आल्या आहेत. यासह पाण्याच्या स्रोतांची निर्जंतुकीकरण करणे आवश्यक आहे. तसेच, आरोग्य विभागाचे पथक व इतर अनुभवी कर्मचारी यांचे नियोजन करून संभाव्य रोगराईला आळा घालण्यासाठी प्रयत्न प्रशासनाकडून केले जात आहेत.

याची होणार अंमलबजावणी..
- धूर फवारणी आणि पावडर टाकून डास नियंत्रण
- सार्वजनिक आणि खासगी पाण्याच्या साठवणुकीची निर्जंतुकीकरण प्रक्रिया
- आरोग्य विभागाकडून पथकाचे नियोजन
- संभाव्य संसर्गाच्या ठिकाणी विशेष लक्ष

अशी घ्यावी खबरदारी
- घरात आणि आजूबाजूच्या परिसरात पाणी साचू देऊ नये
- पाणी साठवणुकीची भांडी झाकून ठेवावीत
- डास प्रतिबंधासाठी मच्छरदाणीचा वापर करावा
- ताप, अंगदुखी, थंडी यांसारखी लक्षणे आढळल्यास वैद्यकीय सल्ला घ्यावा

सर्व गटविकास अधिकारी आणि तालुका आरोग्य अधिकाऱ्यांना त्यांच्या भागात धूर फवारणी आणि पावडर टाकण्यास सांगितले आहे. तसेच पाण्याच्या निर्जंतुकीकरणासाठी उपाय तातडीने केले जाणार आहेत. पूरस्थितीच्या पार्श्वभूमीवर साथीचे आणि संसर्गजन्य रोग पसरू नयेत, म्हणून प्रतिबंधात्मक उपाययोजना करण्यात येत आहेत.
- गजानन पाटील, मुख्य कार्यकारी अधिकारी, जिल्हा परिषद

पुराचे पाणी ओसरल्यानंतर पाण्याचे स्रोत दूषित झाले आहेत. त्यातून आजार पसरण्याची भीती असते. त्यामुळे तातडीने पाण्याचे स्रोत शुद्ध करण्यावर भर देण्यात येणार आहे. याशिवाय चिखल झालेल्या परिसरात पावडर टाकण्याचे नियोजन करण्यात आले आहे.
- डॉ. सचिन देसाई, जिल्हा आरोग्य अधिकारी