पुणे, ता. २९ : स्वातंत्र्यवीर सावरकर यांच्याविषयी वादग्रस्त वक्तव्य केल्याप्रकरणी लोकसभेचे विरोधी पक्षनेते व काँग्रेस नेते राहुल गांधी यांना जामीन मंजूर करताना येथील विशेष न्यायालयाने कोणत्याही अटी-शर्ती घातलेल्या नाहीत. त्यामुळे या अटी-शर्तींचे उल्लंघन केल्याबद्दल गांधींचा जामीन रद्द करण्याच्या मागणीसाठी सात्यकी सावरकर यांनी केलेला अर्ज खोटा, निराधार आणि न्यायालयाची दिशाभूल करणारा असून, त्यामुळे राहुल यांची बदनामी झाली आहे. तसेच न्यायालयाचा अवमान झाला आहे. त्यामुळे सात्यकी सावरकर यांच्याविरोधातच न्यायालयाचा अवमान आणि राहुल यांच्या बदनामीप्रकरणी खटला दाखल करावा, असा युक्तिवाद राहुल गांधींचे वकील अॅड. मिलिंद पवार यांनी केला.
या खटल्यात राहुल गांधी वारंवार तारखा मागून आपली याचिका नोंदविण्यास (प्ली रेकॉर्डिंग) जाणूनबुजून टाळाटाळ करत आहेत. त्यामुळे खटल्याच्या सुनावणीत अडथळा निर्माण होत आहे. त्यामुळे गांधी यांचा जामीन रद्द करून त्यांचा मुचलका जप्त करावा, असा अर्ज सात्यकी सावरकर यांचे वकील संग्राम कोल्हटकर यांनी केला होता. त्यावर गांधींचे वकील पवार यांनी आपले म्हणणे मांडत हा अर्ज खोटा, न्यायालयाची दिशाभूल व अवमान करणारा असल्याचा दावा केला आहे.

‘वंशवेल’चा अहवाल मागवा
ॲड. पवार यांनी फौजदारी प्रक्रिया संहितेच्या कलमांनुसार खटल्याच्या फेरतपासासाठी अर्ज केला असून, सात्यकी सावरकर यांच्या आई हिमानी सावरकर यांच्या माहेरच्या गोडसे कुटुंबाचा वंशवेल न्यायालयात दाखल करण्याची मागणी केली आहे. राष्ट्रपिता महात्मा गांधी यांच्या हत्येच्या खटल्यात नथुराम गोडसे, गोपाळ गोडसे व स्वातंत्र्यवीर सावरकर हे सहआरोपी होते. सात्यकी सावरकर यांनी खटला दाखल करताना त्यांच्या वडिलांचा वंशवेल न्यायालयात दाखल केला आहे. मात्र, आईच्या माहेरचा वंशवेल सादर केलेला नाही. त्यासाठी न्यायालयाने विश्रामबाग पोलिसांना तपासाचे आदेश देऊन गोडसे कुटुंबाचा वंशवेलचा अहवाल मागवावा, अशी मागणी अॅड. पवार यांनी केली आहे. याबाबत न्यायालयाने सात्यकी सावरकर यांचे म्हणणे मागविले आहे. या प्रकरणी १२ जूनला सुनावणी होणार आहे.