पुणे, ता. ३१ ः शहराच्या वेगवेगळ्या भागांमधील रस्त्यांवरील खड्ड्यांमुळे नागरिक त्रस्त असताना आता महापालिका प्रशासनाने ‘खड्डेमुक्त रस्ते अभियान’ राबविण्याचे निश्‍चित केले आहे. महापालिका १५ पथके तयार करणार असून, सात ठेकेदारांच्यामार्फत रस्त्यांच्या दुरुस्तीवर भर दिला जाणार आहे. तीन नोव्हेंबरपासून या अभियानास सुरवात होणार आहे.
मे महिन्यापासून सुरु झालेला पाऊस अद्यापही थांबण्याची चिन्हे नाहीत. त्यातच महापालिका प्रशासनाकडून विविध प्रकारच्या सेवा वाहिन्या टाकण्यासाठी सशुल्क खोदाई करण्यास परवानगी देते. सेवा वाहिन्यांची कामे झाल्यानंतर एप्रिलच्या अखेरपर्यंत खड्ड्यांची दुरुस्ती करून रस्ते पूर्ववत करण्याच्या सूचना महापालिकेकडून दिल्या जातात. विशेषतः मे महिन्यानंतर खोदाई करण्यास मनाई केली जाते. असे असतानाही खोदाईनंतर रस्त्यांच्या दुरुस्तीकडे दुर्लक्ष केले जाते. निकृष्ट दर्जाच्या दुरुस्ती कामामुळे रस्त्यांवरील खड्ड्यांमध्ये वाढ होऊन शहराच्या वेगवेगळ्या भागात वाहतूक कोंडीची समस्या निर्माण होते. हीच परिस्थिती शहराच्या वेगवेगळ्या भागात अजूनही कायम आहे.
दरम्यान, महापालिका आयुक्त नवल किशोर राम यांच्याकडून विविध भागातील प्रकल्प, विकासकामांची पाहणी करण्यात आली. त्यावेळी रस्त्यांवरील खड्ड्यांची त्यांनी गांभीर्याने दखल घेत शहरात ‘खड्डेमुक्त रस्ते अभियान’ राबविण्याचे निश्‍चित केले आहे. त्यानुसार, तीन नोव्हेंबरपासून हे अभियान राबविण्यात येणार आहे. त्यामध्ये १५ पथके तयार करण्यात आली आहेत. संबंधित पथके सात ठेकेदारांच्या मदतीने रस्ते दुरुस्तीला प्राधान्य देणार आहे. प्रत्येक पथकास १० किलोमीटर रस्त्यांची जबाबदारी देण्यात आली आहे. त्यामुळे रस्ते खड्डेमुक्त होण्यास मदत होणार आहे.
-------------------
‘‘शहरातील रस्ते खड्डेमुक्त करण्यात येणार आहेत. त्यासाठी पथ विभागाच्या माध्यमातून तयारी केली जात आहे. महापालिकेची पथके व ठेकेदाराच्या माध्यमातून हे काम केले जाईल. रस्ते दुरुस्तीच्या या कामातून ठेकेदारांना कोणताही फायदा होणार नाही. चांगले रस्ते तयार करून नागरिकांना सुरक्षित वाहतुकीसाठी मार्ग तयार करून देण्यास प्राधान्य दिले जात आहे.
- नवल किशोर राम, आयुक्त, महापालिका
-----------------------