पुणे, ता. १२ ः ‘‘मोडी लिपीचा इतिहास खूप जुना असून ती मराठी भाषा लिहिण्यासाठी वापरली जाणारी एक जुनी लिपी आहे. संस्कृत आणि मराठी भाषेतील उत्तम ग्रंथांचे मोडी लिपीमध्ये लिप्यंतर केल्यास नवीन अभ्यासकांमध्ये मोडी लिपीविषयी उत्सुकता निर्माण होऊन त्यांना प्रेरणा मिळेल’’, असे मत ज्येष्ठ इतिहास अभ्यासक पांडुरंग बलकवडे यांनी व्यक्त केले.
मोडी लिपीचे अभ्यासक दिलीप निकम यांनी श्रीभगवद्‍गीतेतील एक ते १८ अध्यायातील सर्व ७०० श्‍लोकांचे मोडीमध्ये लिप्यंतर केलेल्या हस्तलिखित ग्रंथाचे प्रकाशन बलकवडे यांच्या हस्ते झाले. त्यावेळी ते बोलत होते. याप्रसंगी पुण्यभूषण फाउंडेशनचे संस्थापक अध्यक्ष डॉ. सतीश देसाई, लेखक दिलीप निकम, माजी खासदार अशोक मोहोळ, पर्वती मित्र मंडळाचे अध्यक्ष बाळासाहेब गांजवे, बाळासाहेब निकम आदी उपस्थित होते.
बलकवडे म्हणाले, ‘‘भगवद्‍गीतेतील सर्व श्‍लोकांचे मोडीमध्ये लिप्यंतर करणे एक मोठे अवघड आणि तितकेच चिकाटीचे कार्य दिलीप निकम यांनी केले आहे. त्यांनी मोडी लिपी अवगत करून अनेक जुन्या कागदपत्रांचे मोडी लिपीतून मराठीत लिप्यंतर करण्याचे कामदेखील केले आहे. मोडी लिपीच्या अभ्यासक आणि वाचकांना हा ग्रंथ मार्गदर्शक आणि प्रेरणादायी ठरेल.’’