पुणे, ता. १४ : संतश्रेष्ठ श्री ज्ञानेश्‍वर महाराज आणि जगद्‍गुरू श्री तुकाराम महाराज यांच्या पालखी प्रस्थान सोहळ्यानिमित्त केवळ पुणेच नव्हे तर राज्यभरातून भाविक मोठ्या संख्येने पुण्यात दाखल होतात. त्यांना आळंदी व देहूला जाण्यासाठी सोय व्हावी म्हणून पीएमपी प्रशासनाने यंदाही अतिरिक्त बसगाड्यांचे नियोजन केले आहे. पीएमपी प्रशासनाने पालखी प्रस्थानाच्या वेळी ३१२ बसेसची सोय केली असून, याद्वारे १३०० हून अधिक फेऱ्यांद्वारे भाविकांची सोय होणार आहे.
पीएमपी प्रशासनातर्फे १६ ते २० जूनदरम्यान दर दिवशी आळंदीसाठी नियमितसह अतिरिक्त १४६ बसगाड्या धावणार आहेत. आळंदीसाठी स्वारगेट, हडपसर, पुणे स्टेशन, महापालिका, निगडी, भोसरी, चिंचवड व हिंजवडी येथून बस सुटतील. तसेच देहूसाठी पुणे स्टेशन, महापालिका आणि निगडी येथून बससेवा उपलब्ध असणार आहे. देहूच्या मार्गावर ३७ बस गाड्यांची सोय केली आहे. तसेच देहू ते आळंदीदरम्यान २३ विशेष बस धावणार आहेत.
गुरुवारी (ता. १९) मध्यरात्री १२ पर्यंत आळंदीसाठी बस धावणार असल्याचे पीएमपी प्रशासनाने सांगितले आहे. शुक्रवारी (ता. २०) तीन वाजेपासून पीएमपीची वाहतूक सुरू होत असून अतिरिक्त १६ बसेस आळंदीसाठी धावतील. सकाळी ५.३० पासून ११३ बसेस पुणे व पिंपरी-चिंचवड परिसरातून भोसरी व विश्रांतवाडीमार्गे आळंदीला जाणार आहेत. रविवारी (ता. २२) पालखी हडपसरमध्ये दर्शनासाठी थांबणार असल्यामुळे त्याच दिवशी दुपारी १२ ते १ या वेळेत महात्मा गांधी बसस्थानकातून विविध भागांत जाण्यासाठी विशेष बससेवा उपलब्ध करण्यात येणार आहे. हडपसर ते सासवड मार्गावरील दिवेघाट प्रवासासाठी वाहतूक बंद राहणार आहे. याऐवजी बोपदेव घाट मार्गे ६० जादा बसेस सोडण्यात येतील.

या मार्गांवरून सेवा....
आळंदी व देहूसाठी :
स्वारगेट
पुणे स्टेशन
हडपसर
महापालिका
निगडी, भोसरी, हिंजवडी, चिंचवड