पुणे, ता. ८ : बारावीच्या परीक्षेचा निकाल लागून जवळपास ८५ हून अधिक दिवस उलटून गेले आहेत. तरीही आतापर्यंत बीबीए, बीबीएम अशा अभ्यासक्रमांच्या प्रवेशाची प्रक्रिया सुरू झाली नव्हती. परिणामी या अभ्यासक्रमांच्या प्रथम वर्ष प्रवेशाच्या प्रतीक्षेत असणारे विद्यार्थी हवालदिल झाले आहेत. महाराष्ट्र राज्य सामाईक प्रवेश परीक्षा कक्षाने (सीईटी कक्ष) अखेर उशिरा का होईना जागे होत, या अभ्यासक्रमांच्या प्रवेशाची प्रक्रिया आता सुरू केली आहे. यानुसार विद्यार्थ्यांना १३ ऑगस्टपर्यंत प्रवेशासाठी नोंदणी करता येणार आहे.
सीईटी कक्षाने बीबीए, बीएमएस आणि बीबीएम या व्यवस्थापन अभ्यासक्रमाच्या प्रवेशासाठी घेतलेल्या अतिरिक्त ‘सीईटी’चा निकाल बुधवारी रात्री उशिरा जाहीर केला. प्रवेश प्रक्रियेला झालेला उशीर लक्षात घेता, हा निकाल जाहीर झाल्यानंतर तातडीने आणि अचानकपणे प्रवेशाची प्रक्रिया शुक्रवारपासून सुरू केली आहे. राज्यातील शासकीय, शासकीय अनुदानित, विद्यापीठ व्यवस्थापित, विद्यापीठांतर्गत विभाग आणि विनाअनुदानित खासगी व्यावसायिक शिक्षण संस्थांमधील बीबीए, बीबीएम, बीएमएस यांसह इंटिग्रेटेड एमबीए अभ्यासक्रमाच्या प्रवेशासाठी सीईटी कक्षाने प्रवेश प्रक्रिया जाहीर केली आहे. बीबीए, बीएमएस, बीबीएम अभ्यासक्रमाच्या एकूण जवळपास एक लाख जागांसाठी ९४ हजार विद्यार्थ्यांनी प्रवेश परीक्षा दिली. सीईटी कक्षाकडून १९ आणि २० जुलै रोजी अतिरिक्त सीईटी परीक्षा घेण्यात आली.
या अभ्यासक्रमांच्या केंद्रीय प्रवेश प्रक्रियेसाठी (कॅप) १३ ऑगस्टपर्यंत ऑनलाइन नोंदणी अर्ज करता येणार आहे. दरम्यान, १३ ऑगस्टनंतर आलेले अर्ज ‘नॉन-कॅप’ जागांसाठी ग्राह्य धरले जातील. तसेच, १४ ऑगस्टनंतर निश्चित होणारे अर्ज देखील ‘नॉन-कॅप’ फेरीसाठी ग्राह्य धरण्यात येतील, असे सीईटी कक्षाने स्पष्ट केले आहे.
............
इन्फोबॉक्स :
*बीबीए/बीएमएस/बीबीएम अभ्यासक्रमाच्या सीईटी परीक्षेतील विद्यार्थ्यांची आकडेवारी :*
परीक्षा : नोंदणी केलेले : परीक्षा दिलेले : निकालाची तारीख :
सीईटी : ७२,२५९ : ६१, ६६६ : ४ मे २०२५
अतिरिक्त सीईटी : ४०,६६७ : ३२,८३९ : ६ ऑगस्ट २०२५
...........
प्रवेशाचे वेळापत्रक ः
तपशील : कालावधी
- ऑनलाइन नोंदणी करणे, प्रवेशासाठी आवश्यक कागदपत्रे अपलोड करणे : १३ ऑगस्टपर्यंत
- कागदपत्रांची पडताळणी करणे, अर्ज निश्चिती करणे : ९ ते १४ ऑगस्ट
- तात्पुरती सर्वसाधारण गुणवत्ता यादी जाहीर करणे : १७ ऑगस्ट
- तात्पुरत्या गुणवत्ता यादीवर हरकती व आक्षेप नोंदविणे : १८ ते २० ऑगस्ट
- अंतिम गुणवत्ता यादी जाहीर करणे : २३ ऑगस्ट