पुणे, ता. १० ः ‘‘कृषी क्षेत्रामध्ये देशाला आत्मनिर्भर करण्याचा क्रांतिकारक प्रयत्न डॉ. एम. एस. स्वामिनाथन यांनी केला होता. देशात कृषी विज्ञान केंद्रांची स्थापना करण्यामध्ये त्यांचे योगदान महत्त्वपूर्ण आहे,’’ असे प्रतिपादन महात्मा फुले कृषी विद्यापीठाचे माजी कुलगुरू डॉ. योगेंद्र नेरकर यांनी केले.

कृषी तंत्रज्ञान व्यवस्थापन यंत्रणा आत्मा व कृषी महाविद्यालय पुणे यांच्या संयुक्त विद्यमाने हरितक्रांतीचे जनक डॉ. एम. एस. स्वामिनाथन यांच्या जन्मशताब्दीनिमित्त आयोजित शाश्वत शेती दिन कार्यक्रमात ते बोलत होते. या वेळी कृषी आयुक्त सूरज मांढरे, शास्त्रज्ज्ञ डॉ. एम. सी. खरकवाल, कृषी विस्तार व प्रशिक्षण संचालक रफिक नाईकवडी, फलोत्पादन व अभियांत्रिकी विभागाचे संचालक अंकुश माने, विभागीय कृषी सहसंचालक दत्तात्रेय गवसणी, आत्माचे प्रकल्प संचालक सूरज मडके, कृषी महाविद्यालयाचे सहयोगी अधिष्ठाता डॉ. महानंद माने उपस्थित होते.

डॉ. नेरकर म्हणाले, ‘‘डॉ. एम. एस. स्वामिनाथन यांनी शेतीशास्त्राला आंतरराष्ट्रीय पातळीवर बहुमान मिळवून दिला. देशात राष्ट्रीय प्रात्यक्षिकांचे आयोजन करून बीजोत्पादनात शेतकऱ्यांमध्ये आत्मविश्वास निर्माण केला,’’ तर ‘‘उत्पादनाच्या बाबतीत शेतकऱ्यांना अजूनही कष्ट करावे लागत आहेत. त्यासाठी कृषी विद्यापीठे ही शेतीच्या समस्या सोडविण्यासाठीची केंद्रे व्हायला हवीत,’’ असे मत मांढरे यांनी व्यक्त केले.