पुणे, ता. १० ः इथेनॉलमुळे शेतकऱ्यांना आर्थिक फायदा, कार्बन उत्सर्जन कमी करणे आणि ऊर्जा सुरक्षा वाढवणे यांसारखे फायदे होत आहेत. वीस टक्के इथेनॉलमिश्रित पेट्रोलचा वाहनांवर कसलाही प्रतिकूल परिणाम होत नसल्याचे वेस्ट इंडियन शुगर मिल्स असोसिएशनने (विस्मा) त्यांच्या निवेदनात म्हटले आहे, तसेच पेट्रोलियम आणि नैसर्गिक वायू मंत्रालयाच्या स्पष्टीकरणाचे समर्थन करत असल्याचे नमूद केले आहे.

इथेनॉल उत्पादनामुळे शेतकऱ्यांना एक लाख कोटींपेक्षा जास्त रक्कम देण्यात आली आहे. साखर उद्योगाला आर्थिकदृष्ट्या स्वयंपूर्ण करण्यात इथेनॉलचा महत्त्वाचा वाटा आहे. इथेनॉलमिश्रित पेट्रोलचा वाहनांवर परिणाम होत असल्याची चर्चा पेट्रोलियम आणि नैसर्गिक वायू मंत्रालयाने खोडून काढली आहे. प्रतिष्ठित संस्थांनी केलेल्या व्यापक चाचणीत इथेनॉलमिश्रित पेट्रोलचा वाहनांवर प्रतिकूल परिणाम होत नसल्याचे स्पष्ट झाले आहे. जुन्या वाहनांच्याही इंजिन कार्यक्षमतेवर परिणाम झालेला नाही. इथेनॉल मिश्रण हा वैज्ञानिकदृष्ट्या सिद्ध झालेला, तसेच पर्यावरणीयदृष्ट्या सुरक्षित पर्याय आहे. हा भारताच्या जैवइंधन धोरणाचा आणि ग्रामीण परिवर्तनाचा आधारस्तंभ आहे. साखर क्षेत्र वाढविताना इथेनॉलची उत्पादन क्षमता वाढवण्यासाठी ‘विस्मा’ प्रयत्न करणार आहे, असे ‘विस्मा’चे अध्यक्ष बी. बी. ठोंबरे यांनी निवेदनात म्हटले आहे.