पुणे, ता. १० : स्वातंत्र्यदिनाच्या निमित्त ‘सामाजिक ऐक्य, स्वातंत्र्य आणि स्वास्थ्य’ या तत्त्वांचा पुरस्कार करणारी ‘एटेनेक्स इंडिपेंडन्स डे रन मॅरेथॉन’ कोथरूड येथे शुक्रवारी (ता. १५) सकाळी ४.३० वाजता होणार आहे.

या स्पर्धेसाठी प्रमुख पाहुणे म्हणून आंतरराष्ट्रीय फुटबॉलपटू बायचुंग भुतिया उपस्थिती राहणार आहेत. ‘सकाळ माध्यम समूह’ या स्पर्धेचे माध्यम प्रायोजक आहेत. डीपी रस्त्यावरील केशवबागपासून सुरू होणाऱ्या या शर्यतीत शहरातील विविध वयोगटांतील तीन हजारांहून अधिक धावपटूंनी सहभाग नोंदवला आहे. ही स्पर्धा ३, ५ आणि १० किलोमीटर या प्रकारात होणार आहे. केशवबाग- मातोश्री चौक- नळ स्टॉप- दशभुजा गणपती- कर्वे पुतळा (यूटर्न)- पुन्हा करिष्मा चौक ते केशवबाग हा स्पर्धेच्या मुख्य (१० किलोमीटर) शर्यतीचा मार्ग आहे.
तसेच या स्पर्धेत ‘फन रन’, ‘किड्स रन’ यांसह ज्येष्ठ नागरिकांसाठी मोफत ‘वॉकेथॉन शर्यत’ देखील होणार आहे. प्रत्येक स्पर्धकाला एटेनेक्सचा टी-शर्ट, गुडी बॅग, नाश्ता, हायड्रेशन व रूट सपोर्ट, गिफ्ट व्हाऊचर, ई-सर्टिफिकेट तसेच फिनिशर मेडल दिले जाईल. स्पर्धेच्या १० किलोमीटर शर्यतीत पहिल्या क्रमांकाला ५० हजार रुपये, दुसऱ्या क्रमांकाला १५ हजार रुपये आणि तिसऱ्या क्रमांकाला ७ हजार ५०० रुपये, अशी बक्षीसे मिळणार आहेत.