पुणे, ता. १० ः औषधोपचारांचा वाढता खर्च लक्षात घेता गरीब आणि गरजू रुग्णांना मोठ्या रूग्णालयात जाऊन उपचार घेणे जवळपास अशक्य झाले आहे. मात्र, या पार्श्वभूमीवरदेखील शेठ ताराचंद रामनाथ धर्मार्थ आयुर्वेदीय रुग्णालय आपले सेवेचे व्रत कायम ठेवत गरीब आणि गरजू रुग्णांना परवडणाऱ्या दरांत सेवा देण्‍यासाठी वचनबद्ध राहील, असा विश्वास रुग्णालयाचे कार्यकारी विश्वस्त गोपाळ राठी यांनी व्यक्त केला.
शेठ ताराचंद रुग्णालयाने ९९ वर्ष पूर्ण करून शंभराव्या वर्षात पदार्पण केले आहे. यानिमित्त रविवारी आयोजित वर्धापनदिन समारंभात राठी बोलत होते. रास्ता पेठ येथील रूग्णालयाच्या प्रांगणात झालेल्या या कार्यक्रमाला रुग्णालयाच्या नियामक मंडळाचे अध्यक्ष राजेंद्र हुपरीकर, उद्योजक सत्यप्रकाश जोशी, अष्टेकर ज्वेलर्सचे विपुल अष्टेकर आणि रूग्णालयाचे विश्वस्त डॉ. अभय इनामदार उपस्थित होते.
राठी म्हणाले, ‘‘टू सर्व्ह द कॉमन मॅन'' या उदात्त हेतूने पायाभरणी करण्यात आलेल्या या रुग्णालयाने कायमच आपले सेवेचे ध्येय ढळू दिले नाही. औषधोपचार, शल्यचिकित्सा साधने, रूग्णालयातील कर्मचाऱ्यांच्या पगारापासून इतर खर्च या सगळ्याची जुळवाजुळव करणे अवघड होते. मात्र, समाजातील दानशूर व्यक्तींचा रुग्णालयावर असलेला विश्वास आणि त्या विश्वासाच्या जोरावर मिळणाऱ्या देणग्या तसेच राज्य सरकार आणि पुणे महापालिकेकडून वेळोवेळी मिळणाऱ्या मदतीमुळे हा टप्पा गाठता आला आहे. रूग्णालयाद्वारे पैसे कमावणे हे ध्येय कधीच नव्हते आणि भविष्यातही ते नसेल.’’
विविध स्पर्धांमधील विजेते गुणवंत डॉक्टर, अधिकारी, कर्मचारी, परिचारिका यांना पारितोषिके देऊन गौरविण्यात आले. तसेच निवृत्त कर्मचाऱ्यांचा सत्कारदेखील यावेळी करण्यात आला. डॉ. ऐश्वर्या रानडे यांनी सूत्रसंचालन केले. डॉ. कल्याणी भट यांनी आभार मानले.

फोटो ः 38957