पुणे, ता. १६ : गरोदरपणातील उच्च रक्तदाबामुळे चोवीसवर्षीय सुनीताच्‍या (नाव बदललेले) दोन्‍ही किडन्‍या (मूत्रपिंड) निकामी झाल्‍या. किडनी प्रत्‍यारोपणासाठी खासगी रुग्‍णालयांनी १५ ते २० लाखांचा खर्च सांगितला. अखेर त्‍यांना ‘ससून’चा आधार मिळाला व किडनी प्रत्‍यारोपण झाले. कर्नाटक येथील अंगणवाडी मदतनीस आईनेच मुलीला स्‍वतःची किडनी दान करून लेकीला पुन्‍हा एकदा पुनर्जन्‍म दिला.
हे प्रत्‍यारोपण सात ऑगस्‍ट रोजी ससून रुग्‍णालयात पार पडले. खासगी रुग्‍णालयात १५ ते २० लाख खर्च सांगितला होता. तीच प्रत्‍यारोपण शस्त्रक्रिया येथे विविध सरकारी योजना व दात्‍यांच्‍या दातृत्‍वातून अवघ्या लाखभर रुपयात झाली. विजयापुरा (कर्नाटक) येथील अंगणवाडीमध्ये मदतनीस म्हणून काम करणाऱ्या महिलेने सुनीताचा विवाह २०२१ ला पुण्यातील वाहनचालक असलेल्‍या तरुणाबरोबर लावून दिला. दुसऱ्या वर्षी तिला मुलगी झाली. परंतु, गरोदरपणातील उच्च रक्तदाबामुळे तिच्या दोन्‍ही किडन्या निकामी झाल्‍याचे निदान कर्नाटकातील यशोदा रुग्‍णालयातील डॉक्‍टरांनी केले. त्‍यासाठी १५ ते २० लाख रुपयांचा खर्च खासगी रुग्‍णालयांनी सांगितल्‍यानंतर त्‍यांच्‍या पायाखालची वाळूच सरकली. कारण सुनीताच्‍या वडिलांचा आधीच मृत्‍यू झालेला असून, एकटी आई व व्यवसायाने चालक असलेल्‍या पतीच्‍या आवाक्‍याबाहेर हा खर्च होता.
आर्थिक परिस्थितीपुढे हतबल होऊन त्‍यांनी किडनी प्रत्‍यारोपण करण्याचा विचार सोडून फक्त डायलिसिस (आठवड्यातून तीन वेळा रक्‍त शुद्ध करण्‍याची प्रक्रिया) सुरू ठेवले. हे वर्षभर सुरू होते. दरम्‍यान, सुनीताच्‍या पतीला ओळखीच्‍यांकडून ‘ससून’मध्ये अत्यंत कमी खर्चात प्रत्‍यारोपण होते, हे समजल्यानंतर गेल्‍या वर्षी मार्चमध्ये चौकशी केली. तपासण्‍याअंती सात ऑगस्‍ट रोजी प्रत्‍यारोपण शस्त्रक्रिया झाली. आता दोघी मायलेकींची प्रकृती स्थिर आहे.
शल्यचिकित्साशास्त्र विभागप्रमुख डॉ. लता भोईर, डॉ. पद्मसेन रणबागळे, डॉ. सुरेश पाटणकर, मेडिसिन विभागाचे प्रमुख डॉ. हरिदास प्रसाद, डॉ. संजय मुंडे, डॉ. निरंजन आंबेकर, डॉ. संदीप मोरखंडीकर, डॉ. राजेश श्रोत्री, डॉ. हर्षद तोष्णीवाल, डॉ. विवेक बारेकर, भूलशास्‍त्र विभागाच्‍या प्रमुख डॉ. सुरेखा शिंदे, डॉ. सुजित क्षीरसागर, सिस्टर राजश्री कानडे, मुख्य अधिसेविका विमल केदारी या सर्वांचा यात सहभाग होता.

‘‘ससूनमध्ये हे ३४ वे किडनी प्रत्‍यारोपण झाले आहे. रुग्णांना रुग्णालयात उपलब्ध नसलेली औषधे, इंजेक्‍शन्स, शस्त्रक्रियेसाठी आवश्यक असलेले साहित्य व प्रत्यारोपण शस्त्रक्रियेनंतरच्या आवश्यक तपासण्यांकरिता खर्चही सवलतीच्या दरात होतो. त्‍यामुळे रुग्‍णांना अत्यंत कमी खर्च येतो.
– डॉ. एकनाथ पवार, अधिष्‍ठाता, ससून रुग्‍णालय
.............
‘‘प्रत्‍यारोपणासाठी रुग्णांना पंतप्रधान निधीतून अडीच लाखांची मदत मिळते. तसेच महात्मा ज्योतिबा फुले जनआरोग्य योजना, ओसवाल बंधू समाज, मुकुल-माधव फाउंडेशन, रंभा चॅरिटेबल ट्रस्ट, टाटा ट्रस्ट, मुंबई यांच्याद्वारे प्रत्येक रुग्णाला आर्थिक मदत मिळते. त्‍यामुळे गरीब रुग्‍णांची किडनी प्रत्‍यारोपण शस्त्रक्रिया लाखभर रुपयामध्ये होऊ शकते.
– सत्यवान सुरवसे, अवयव प्रत्यारोपण समन्वयक, ससून रुग्‍णालय
..............