पुणे, ता. १६ ः रंगभूमी, चित्रपट, मालिका अशा तीनही माध्यमांमध्ये लीलया मुशाफिरी करणाऱ्या चतुरस्र व ज्येष्ठ अभिनेत्री ज्योती चांदेकर (वय ६८) यांचे शनिवारी पुण्यात निधन झाले. त्यांच्या पश्चात दोन मुली आहेत. अभिनेत्री तेजस्विनी पंडित या चांदेकर यांच्या कन्या आहेत.
ज्योती चांदेकर यांच्यावर गेल्या तीन-चार दिवसांपासून खासगी रुग्णालयात उपचार सुरु होते. उपचारादरम्यान त्यांची दुपारी चारच्या सुमारास प्राणज्योत मालवली. चांदेकर यांच्या पार्थिवावर रविवारी (ता. १७) सकाळी ११ वाजता वैकुंठ स्मशानभूमीत अंत्यसंस्कार होणार आहेत.
चांदेकर यांचा जन्म रत्नागिरीचा. त्यांचे शिक्षण पुण्यात झाले. शालेय वयातच ‘सुंदर मी होणार’ या नाटकातून त्यांच्या अभिनय प्रवासाला प्रारंभ झाला. ‘रखेली’ या पहिल्याच व्यावसायिक नाटकातील त्यांच्या भूमिकेचे सर्वत्र कौतुक झाले. ‘राजकारण गेले चुलीत’ या नाटकात अरुण सरनाईक आणि निळू फुले अशा दिग्गज अभिनेत्यांसह काम करताना त्यांनी आपली स्वतंत्र ओळख निर्माण करण्यात यश मिळवले. या दोन्ही नाटकांचे त्यांनी हजारांहून अधिक प्रयोग केले.
‘कथा अकलेच्या कांद्याची’, ‘सोळावं वरिस धोक्याचं’, ‘बेईमान’, ‘आमदार सौभाग्यवती’, ‘उत्तररात्र’ अशा असंख्य नाटकांमधून ज्योती चांदेकर यांनी रंगभूमीवर सातत्याने काम केले. ‘ग्यानबाची मेख’, ‘संसार’, ‘कथा दोन गणपतरावांची’, ‘बिनधास्त’, ‘तिचा उंबरठा’ अशा अनेक मराठी चित्रपटांमधून त्यांनी काम केले. या दरम्यान त्यांचा विवाह रणजित पंडित यांच्याशी झाला होता. पंडित यांचे काही वर्षांपूर्वी दीर्घ आजाराने निधन झाले.
‘सुखांत’, ‘मी सिंधूताई सपकाळ’ या चित्रपटांमधील चांदेकर यांच्या भूमिकेचे कौतुक झाले होते. विशेष म्हणजे, ‘मी सिंधूताई सपकाळ’ या चित्रपटात सिंधूताई सपकाळ यांच्या वयाच्या दोन भिन्न टप्प्यावरील भूमिका त्यांनी आणि त्यांची कन्या व अभिनेत्री तेजस्विनी पंडित यांनी साकारल्या होत्या. काही हिंदी चित्रपटांमध्ये, तसेच मालिकांमध्येही त्यांनी अभिनय केला. नाट्य परिषदेच्या जीवनगौरव पुरस्कारासह विविध पुरस्कारांनी त्यांना सन्मानित करण्यात आले होते.
फोटो ः 40489