लहानपणापासूनच मला गणपती बाप्पाचे प्रचंड वेड आहे. आमच्या घरी गणपती बसत नाही म्हणून मी सदाशिव पेठ येथील आमच्या गल्लीतील ‘वंदे मातरम मंडळात सहभागी झालो. सर्व कार्यकर्त्यांमध्ये मी लहान असल्याने थोरामोठ्यांकडून कामे समजावून घेतली. आता मी मंडळाचा उत्सव प्रमुख म्हणून कार्यरत आहे. मंडळाचे नाव नावारूपास कसे येईल, यासाठीच कटिबद्ध आहे. दहा दिवसांतील सजावट, आगमन सोहळा रथ आणि विसर्जन मिरवणूक रथ, याचे नियोजन व प्रत्यक्ष काम वेळेत व चांगले कसे होइल, हा माझा प्रयत्न असतो. मंडळ म्हटले की, सर्वच सदस्यांच्या विचारांना सन्मान देणे आवश्यक आहे. त्यातून सर्वांच्या विचारांची एक बांधणी करून कामे पूर्णत्वास घेऊन जाण्यास व सर्वांनाच संधी मिळावी, याला मी महत्त्व देत आलो आहे. मंडळातर्फे महापालिका सफाई कामगारांचा सत्कार करण्यात येतो. तसेच रक्तदान शिबिर, मोफत आरोग्य शिबिर आदी वार्षिक समाजोपयोगी उपक्रम राबवले जातात. मंडळाचे ‘अमृतमहोत्सवी वर्ष’ हे अतिशय प्रभावशाली, गौरवशाली, दिमाखदार पद्धतीने साजरे करण्याचा माझा व माझ्या मंडळाचा मानस असणार आहे.